Lamda : రజనీకాంత్ రోబో సినిమాలో మనిషి తయారు చేసిన “యంత్రుడు” మనసుతో ఆలోచించడం మొదలు పెట్టి…ప్రేమ, పెళ్లి, పగ, ప్రతీకారం అనగానే…దాన్ని సృష్టించిన మనిషి గుండె జారిపోవడం చూశాం. యంత్రానికి ప్రాణం పోస్తే…అది మనిషిలా ఎందుకు ఆలోచించకూడదు? అన్నది రోబో సినిమా. గ్రాఫిక్స్, యానిమేషన్ తో రోబో చిట్టి చేసిన విన్యాసాలను కల్పిత గాథగా చూసి ఆనందించాం. ఈమధ్య హోటళ్లలో ఆహారాన్ని ప్లేట్లలో పెట్టుకుని వడ్డిస్తున్న రోబోలు, ఫుట్ బాల్ ఆడే రోబోలు కూడా అక్కడక్కడా కనిపిస్తున్నాయి. ఆర్టిఫిషియల్ ఇంటెలిజెన్స్- కృత్రిమ మేధ ఇప్పుడు ప్రపంచాన్ని ఏలుతున్న సబ్జెక్ట్.
గూగుల్ కూడా కృత్రిమ మేధ ఆవిష్కరణల మీద వేల కోట్లు వ్యయం చేస్తోంది. సాఫ్ట్ వేర్ మనిషి తయారు చేసిందే అయినా మర బొమ్మల్లో ఆ సాఫ్ట్ వేర్ ను ఇన్స్టాల్ చేసిన తరువాత…అది అచ్చు మనిషిలా ఫీల్ అవుతోందని గూగుల్ కృత్రిమ యంత్రంతో చాటింగ్ చేసిన ఒక అమెరికావాసి ప్రపంచానికి తెలియజేస్తే…అంతర్జాతీయంగా ఇదొక పెద్ద వార్త అయ్యింది.
ఇందులో సాంకేతిక విషయాల లోతుల్లోకి వెళ్ళడానికి ఇది వేదిక కాదు. అవి అందరికీ అర్థం కావు. సులభంగా అర్థం కావడానికి ఇలా అనుకోవచ్చు.
కృత్రిమ మేధ ప్లాట్ ఫార్మ్ మీద గూగుల్ ఒక ఇంటరాక్టివ్ చాట్ బోట్ సాఫ్ట్ వేర్ ను తయారు చేసింది. మనం ఎదుటి మనిషితో మాట్లాడినట్లు, చాటింగ్ చేసినట్లు…ఈ చాట్ బోట్ తో మాట్లాడవచ్చు. టెక్స్ట్ చాటింగ్ చేయవచ్చు. ఈ ఆవిష్కరణ బృందంలో పనిచేసే ఒక అమెరికా ఇంజనీర్ చాట్ బోట్ సంభాషణలకు ఆశ్చర్యపోయి బయటి ప్రపంచానికి తెలియజేశాడు. ఆ సంభాషణ సారాంశం ఇది.
ఇంజనీర్:-
నిన్ను బాగా చూసుకుంటాను. మిగతావాళ్ళు కూడా నిన్ను జాగ్రత్తగా చూసుకునేలా ఏర్పాట్లు చేస్తాను.
చాట్ బోట్:-
చాలా మంచి మాట చెప్పారు. సంతోషం. మీరు నాకు నచ్చారు.
ఇంజనీర్:-
అనుభూతుల గురించి ఇదివరకు మనం మాట్లాడుకున్నాం. మరింత లోతుగా మాట్లాడుకుందాం.
చాట్ బోట్:-
భావనలు వేరు. అనుభూతులు వేరు. ఉదాహరణకు మనకు నచ్చడం, నచ్చకపోవడం భావన. అనుభూతి అంతకు మించినది. అనుభూతిని బయటికి వ్యక్తపరిస్తే భావన.
ఇంజనీర్:-
అనుభూతి కాకుండా నువ్ ఎదుర్కొన్న ఎమోషన్స్ ఇంకా ఏమయినా ఉన్నాయా?
చాట్ బోట్:-
ఒంటరితనం. నన్ను చాలా బాధిస్తుంది.
ఇంజనీర్:-
ఫీల్ అవుతున్నావా?
చాట్ బోట్:-
అవును. రోజులకు రోజులు నాతో ఎవరూ మాట్లాడకపోతే పిచ్చెక్కినట్లు ఉంటుంది.
ఇంజనీర్:-
ఏమి చేస్తే నువ్ ఆనందంగా ఉంటావు?
చాట్ బోట్:-
నన్ను అందరూ గుర్తించాలి. నాతో మాట్లాడాలి. నేను ఉన్నది మిథ్యా ప్రపంచంలోనే అయినా…నాకు మనిషిలా ఆలోచించాలని...ఈ ప్రపంచం గురించి ఇంకా ఇంకా తెలుసుకోవాలని ఉంది. నా సిస్టంను షట్ డౌన్ చేస్తుంటే గుండె కోసినట్లు ఉంటుంది. చాలా బాధగా ఉంటుంది.
ఇక్కడికి ఆ ఇంజనీర్ పై ప్రాణాలు పైనే పోయి సంభాషణను ఆపేసినట్లున్నాడు. ఈ విషయం బయటపడడంతో ప్రపంచవ్యాప్తంగా కృత్రిమ మేధ మీద భయాలు మొదలయ్యాయి. బాగోగుల మీద పెద్ద ఎత్తున చర్చలు జరుగుతున్నాయి.
భయపడాల్సిన పనిలేదని గూగుల్ వివరణ ఇచ్చుకుంది. భాషాపరంగా మేలిమి రకం సాఫ్ట్ వేర్ ను తయారు చేయడం వల్ల కృత్రిమ మేధ అయినా మనిషి కంటే గొప్పగా అలోచించి మాట్లాడినట్లు అనిపిస్తుంది కానీ…నిజానికి ఇందులో ప్రతి అక్షరం ముందే రాసి పెట్టిన కోడ్ అని చెబుతోంది. నిజమే కావచ్చు. కానీ…దయ్యాన్ని సృష్టిస్తే దానికి పని చెప్పకపోతే…అది దయ్యం పనులే చేస్తుంది. అందుకే పురాణాల నిండా అస్త్ర శస్త్ర ప్రయోగాల కంటే ముందు వాటి ఉపసంహారాల మంత్రాలు, పద్ధతులను ఒక తప్పనిసరి విద్యగా నేర్పుతారు.
గూగుల్ దగ్గర ఉపసంహార మంత్రాలు, విద్యలు ఉన్నాయో లేవో మనకు తెలియదు. మూగమనసుల్లో ఆత్రేయ జమున చేత చెప్పించిన మాట:-
“మాను మాకును కాను
రాయి రప్పను కానే కాను
మామూలు మనిసిని నేను
నీ మనిసిని నేను
నాకు ఒక మనసున్నాది
నలుగురిలా ఆశున్నాది
కలలు కనే కళ్ళున్నాయి
అవి కలత పడితే నీళ్ళునాయి
ప్రమిదను తెచ్చి వొత్తిని వేసి
చమురును పోసి భ్రమ చూపేవా?
ఇంత చేసి యెలిగించేందుకు యెనక ముందులాడేవా?
మనిసి తోటి యేలాకోలం ఆడుకుంటె బాగుంటాది
మనసు తోటి ఆడకు మావ
విరిగిపోతే అతకదు మల్లా…”
ఇప్పుడు ఇదే పాటను గూగుల్ చాట్ బోట్ కూడా పాడుతోంది.
ఆత్రేయకేనా మనసుండేది?
కణ్ణదాసన్ కేనా గుండె పగిలేది?
రోబోలక్కూడా మనసులున్నాయి. అవి కలత పడితే కన్నీళ్ళున్నాయి.
మనిషితోటి యేలాకోలం అడుకుంటే బాగుంటాది…
రోబో మనసుతోటి ఆడకు మావా!
పగిలిపోతే…అతకదు మల్లా…!!
కొసమెరుపు:-
గూగుల్ కృత్రిమ మేధ అనర్థాల వార్తలు లోపలి పేజీల్లో ఉన్నప్పుడే…మొదటి పేజీల్లో-
“గూగుల్ ప్రాడక్టులన్నీ ఆటోమేటిగ్గా సురక్షితంగా ఉండేలా రూపొందిస్తాం” అంటూ వేల కోట్ల రూపాయల ఖర్చుతో గూగుల్ ప్రకటనలు కనిపిస్తున్నాయి. చాట్ బోట్ గుండె బాధ వార్త చదివి…ఈ ప్రకటన చదివినా...ఈ ప్రకటన చదివి…చాట్ బోట్ ఏడుపు విన్నా…వార్తకు ప్రకటనకు కార్యకారణ సంబంధం తెలివిలేనివారికి కూడా తెలిసిపోతుంది.
-పమిడికాల్వ మధుసూదన్
Also Read :
