గ్యాంబ్లింగ్ టూర్స్

Bumper Offer:

పేకాటకు అప్పు ఇవ్వబడును
ఔత్సాహిక జూదరులు, అంతర్జాతీయ జూద పర్యాటకులకు తక్కువ వడ్డీకి అధిక మొత్తంలో రుణాలు ఇవ్వబడును. జూద వ్యసనం స్థాయిని బట్టి రుణం 20 కోట్ల వరకు ఇవ్వగలం. ఎలాంటి పత్రాలు, పూచీకత్తులు అవసరం లేదు. మిమ్మల్ను మీరు తాకట్టు పెట్టుకుని…మీ పాస్ పోర్ట్ మాకు ఇస్తే చాలు.

మందు- విందు- పొందు
మా దగ్గర జూదమాడే వారికి మూడు “దు” ప్రాసల వ్యసనాల కొనసాగింపు అవకాశం కూడా ఉంది. దానికి అదనంగా చెల్లించాల్సి ఉంటుంది.

జూదాదాయం
థాయ్ ల్యాండ్ సందుల్లో జూదం ద్వారా ఆదాయం సంపాదిస్తే అది విదేశీ సవర్ణదీర్ఘ సంధి అయి…జూదాదాయం అవుతుంది. ఆ సొమ్మును హవాలా రూపంలో భారత్ లో మీ ఇంట్లో డెలివరీ చేసే బాధ్యత కూడా మాదే.

అంతర్జాతీయ గ్యాంబ్లింగ్ కార్డు
వివిధ బ్యాంకులు డెబిట్, క్రెడిట్ కార్డులిచ్చినట్లు మా గ్యాంబ్లింగ్ కంపెనీ చిప్ ఆధారిత గ్యాంబ్లింగ్ స్మార్ట్ కార్డు అందుబాటులో ఉంది. కోటి రూపాయల నుండి ఇరవై కోట్ల రూపాయల వరకు మీ జూద కాంక్ష, అవసరాలను బట్టి కొనవచ్చు.

జూదంలో జాదూ కోర్సు
జూదంలో పూర్వానుభవం లేనివారికి ఏ బి సి డి లనుండి అన్నీ మేమే నేర్పి భావి భారత జూదరులుగా తీర్చిదిద్దడానికి మేము బాధ్యతాయుతమయిన జూద విద్యా బోధనలోకి కూడా ప్రవేశించాము. మా జూద విద్య డిగ్రీకి లాస్ వేగాస్ మొదలు అంతర్జాతీయంగా అన్ని క్యాసినోల్లో ప్రత్యేకమయిన గుర్తింపు ఉంది.

జూదం టేబుల్ మెనూ
రోజుకు 25 గంటలు జూదం ఆడేవారు తినడానికి టేబుల్ వదిలి వెళ్లడం భావ్యం కాదు. దాంతో జూదం టేబుల్ దగ్గరే జూదం ఆడుతూ…తినడానికి ప్రత్యేకమయిన, బలవర్ధకమయిన మెనూ ఉంది.

అంతర్జాతీయ జూద శిఖామణి అవార్డు
మేము వివిధ దేశాలకు అంతర్జాతీయ జూదరులను తీసుకెళ్లడం మొదలు పెట్టి పాతికేళ్లు పూర్తయిన సందర్భంగా “జూద శిఖామణి” అవార్డులను అందజేస్తున్నాం. శకుని పుట్టిన రోజు, చచ్చిన రోజు…ఈ అవార్డులను అందజేస్తాం.

వీకెండ్ జూదం
సాఫ్ట్ వేర్ ఉద్యోగులకు వారాంతంలో జూదానందం కోసం ఊరవతల అడవిలో అరవై ఎకరాల్లో మా “పాచిక” రిసార్ట్ ఆహ్వానం పలుకుతోంది. “పేక”, “పోకర్”, “అందర్- బాహర్”, “పాపర్”, “దివాలా” పేరిట ప్రత్యేక సూట్లు అందుబాటులో ఉన్నాయి.

జూద ధర్మం ప్రవచనం
రోజూ సాయంత్రం ఆరు గంటలకు మా క్యాసినోలో దీపాలు ఆర్పగానే జూద ధర్మం చీకటి పురాణ ప్రవచనం కూడా ఉంటుంది. పేకాట పరాయణులు ఈ మహదావకాశాన్ని వినియోగించుకుని జూద ధర్మ జ్ఞానం పొందగలరు.

-పమిడికాల్వ మధుసూదన్
[email protected]