టాలీవుడ్ సీనియర్ స్టార్ హీరోలలో వెంకటేశ్ ఒకరు. ఎప్పటికప్పుడు కొత్తదనం కోసం ఆయన ట్రై చేస్తుంటారు. ఇక రానా కూడా మొదటి నుంచి విభిన్నమైన .. విలక్షణమైన పాత్రలను ఎంచుకుంటూ వెళుతున్నారు. ఈ నేపథ్యంలోనే ఈ ఇద్దరూ కలిసి వెండి తెరపై కనిపిస్తే బాగుంటుందనే అభిప్రాయాన్ని చాలా కాలంగా అభిమానులు వ్యక్తం చేస్తున్నారు. అలా అభిమానుల ముచ్చట తీర్చే అవకాశం వారికి వెబ్ సిరీస్ తో రావడం విశేషం. ఆ వెబ్ సిరీస్ పేరే ‘రానా నాయుడు’.
రానా తన పేరుతో ఉన్న పాత్రనే పోషించడం .. వెంకటేశ్ కి కొడుకుగా నటించడం ఈ వెబ్ సిరీస్ ప్రత్యేకతగా చెప్పుకోవచ్చు. అలాంటి ఈ వెబ్ సిరీస్ నుంచి ‘నెట్ ఫ్లిక్స్’ వారు నిన్న ట్రైలర్ ను రిలీజ్ చేశారు. ఇటు వెంకటేశ్ .. అటు రానాపై పాత్రలకి సంబంధించిన విభిన్నమైన కోణాలను ఈ ట్రైలర్ లో ఆవిష్కరించారు. తండ్రీకొడుకులకు ఎంతమాత్రం పొసగకపోవడం .. తండ్రిని కొడుకు ద్వేషించడం ఈ ట్రైలర్ లో కనిపించింది.
ఒక వైపున ముంబైలోని అరాచక శక్తులతో చేతులు కలిపిన రానా .. మరో వైపున తన కుటుంబ సభ్యుల నుంచే ఆదరణ కరువైన వెంకటేశ్ పాత్రలు చూస్తుంటే, ఈ ఇద్దరి మధ్య అసలు ఏం జరిగిందనేది ఆసక్తికరంగా మారింది. యాక్షన్ .. ఎమోషన్ తో పాటు రొమాన్స్ కి కూడా చోటిచ్చారనే విషయం అర్థమవుతోంది. నిర్మాణ విలువలు ఒక రేంజ్ లోనే కనిపిస్తున్నాయి. కరణ్ అన్షుమాన్ దర్శకత్వం వహించిన ఈ వెబ్ సిరీస్, వచ్చేనెల 10వ తేదీ నుంచి స్ట్రీమింగ్ కానుంది.
