సిద్ధార్థ్ హీరోగా తమిళంలో సెప్టెంబర్ 28వ తేదీన ‘చిత్తా’ సినిమా విడుదలైంది. సిద్ధార్థ్ తన సొంత బ్యానర్లో నిర్మించిన ఈ సినిమాకి అరుణ్ కుమార్ దర్శకత్వం వహించాడు. తమిళంలో ఈ సినిమాకి సక్సెస్ టాక్ వచ్చింది. సిద్ధార్థ్ కెరియర్లో చెప్పుకోదగిన సినిమాలలో ఇది ఒకటిగా చెప్పుకున్నారు. అదే రోజున తెలుగులో కూడా ఈ సినిమాను విడుదల చేయడానికి సిద్ధార్థ్ ప్రయత్నించాడు గానీ, థియేటర్లు దొరకలేదు. ఈ విషయాన్ని ఆయనే స్వయంగా చెప్పాడు.
ఈ నెల 6వ తేదీన ఈ సినిమాను ‘చిన్నా’ పేరుతో ఇక్కడ విడుదల చేశారు. ఈ సినిమాకి సంబంధించిన ప్రెస్ మీట్ లో సిద్ధార్థ్ ఎమోషనల్ అయ్యాడు కూడా. ఈ సినిమా తప్పకుండా కనెక్ట్ అవుతుందనీ, ఇలాంటి సినిమాను తాను మళ్లీ తీయలేకపోవచ్చని అన్నాడు. ఇలాంటి కంటెంట్ దొరకడమే కష్టమని చెప్పాడు. సిద్ధార్థ్ కి మార్కెట్ లేదు .. క్రేజ్ లేదు .. ఆయన సినిమాను ఎందుకు చూడాలి? అనుకునేవారి అభిప్రాయాలను ఈ సినిమా మారుస్తుందని బలంగా చెప్పాడు.
అయితే దాదాపు అరడజను సినిమాలతో కలిసి థియేటర్స్ కి వచ్చిన ఈ సినిమా, సిద్ధార్థ్ ఆశించిన స్థాయిలో రెస్పాన్స్ ను రాబట్టుకోలేకపోయిందనే అనిపిస్తోంది. ఫస్టాఫ్ కాస్త సాగదీసినట్టుగా ఉన్నప్పటికీ, సెకండాఫ్ లో ఈ కథ ఆసక్తిని పెంచుతూ వెళుతుంది. నటన పరంగా సిద్ధార్థ్ ను మరో మెట్టు పైకి ఎక్కించిన సినిమా ఇది. కథ మరీ కొత్తదికాకపోయినా, ట్రీట్మెంట్ పరంగా ఆకట్టుకుంటుంది. ఈ సినిమాతో మంచి మెసేజ్ కూడా ఇచ్చారు. కాకపోతే ఫస్టాఫ్ లో కథ మరీ స్లోగా సాగడమే అసంతృప్తిని కలిగిస్తుందనే మాట ఆడియన్స్ వైపు నుంచి వినిపిస్తోంది.
