విజయ్ సేతుపతికి తమిళనాట ఉన్న క్రేజ్ గురించి ప్రత్యేకంగా చెప్పుకోవలసిన పనిలేదు. ఆయన నుంచి ఒక సినిమా వస్తుందంటే, ఆ సినిమా కోసం అక్కడి అభిమానులంతా ఎంతో ఆసక్తికరంగా ఎదురుచూస్తూ ఉంటారు. ఆయన ఒక సినిమా ఒప్పుకున్నాడంటే, ఆ సినిమాలో .. ఆయన పాత్రలో తప్పకుండా ఏదో కొత్త విషయం ఉండే ఉంటుందని అభిమానులు అనుకుంటారు. అంతగా ఆయన వాళ్ల నమ్మకాన్ని సంపాదించుకున్నాడు,
ఆయన తాజా చిత్రంగా రూపొందిన ‘మహారాజ’ ఈ నెల 14వ తేదీన తమిళంలో విడుదలైంది. తెలుగులోను అదే టైటిల్ తో అదే రోజున ప్రేక్షకుల ముందుకు వచ్చింది. మమతా మోహన్ దాస్ .. అనురాగ్న్ కశ్యప్ .. భారతీరాజా ముఖ్యమైన పాత్రలను పోషించారు. సుందరం – జగదీశ్ పళనిసామి నిర్మించిన ఈ సినిమాకి నిథిలన్ స్వామినాథన్ దర్శకత్వం వహించాడు. తమిళంలో విడుదలైన తొలి రోజునే ఈ సినిమా హిట్ టాక్ తెచ్చుకుంది.
కెరియర్ పరంగా ఈ సినిమా విజయ్ సేతుపతికి 50వ సినిమా. ఓపెనింగ్స్ రోజు నుంచే ఈ సినిమా దూసుకుపోతోంది. విడుదలైన ప్రతి ప్రాంతంలో వసూళ్ల పరంగా కొత్త రికార్డులను నమోదు చేస్తోంది. ఆల్రెడీ ఈ సినిమా 60 కోట్ల గ్రాస్ మార్క్ ను దాటేసింది. 100 కోట్ల క్లబ్ లోకి ఈ సినిమా చేరుకోవడానికి పెద్దగా సమయం పట్టకపోవచ్చని అంటున్నారు. కథలోని ఎమోషన్స్ .. విజయ్ సేతుపతి నటన .. అజనీశ్ లోక్ నాథ్ నేపథ్య సంగీతం ఈ సినిమా ఈ స్థాయి విజయాన్ని సాధించడానికి కారణమనే అభిప్రాయాలు వ్యక్తమవుతున్నాయి.
