కొన్ని వెబ్ సిరీస్ లను ప్రేక్షకులు మరిచిపోలేరు. అందుకు కారణం కథ .. స్క్రీన్ ప్లే .. పాత్రలను డిజైన్ చేసిన తీరు .. కొత్తదనం అనే చెప్పాలి. ఇక ఆ సిరీస్ కి భారీతనం ప్రధాన ఆకర్షణగా నిలిస్తే, అది ఎప్పటికీ ఆడియన్స్ కి గుర్తుండిపోతుంది. అలా చాలామందికి గుర్తుండిపోయిన వెబ్ సిరీస్ గా ‘మీర్జాపూర్’ కనిపిస్తుంది. అమెజాన్ ప్రైమ్ లో చాలా కాలం క్రితం అంటే 2018లో స్ట్రీమింగును మొదలుపెట్టిన ఈ సిరీస్, మొదట్లో ఆడియన్స్ కి కొత్తగా అనిపించింది .. ఆ తరువాత కనెక్ట్ కావడం మొదలుపెట్టింది.
ఇక కొంతకాలం తరువాత సీజన్ 2 ప్రేక్షకుల ముందుకు వచ్చింది. ఈ సీజన్ లో అభ్యంతరకరమైన సంభాషణలు .. సన్నివేశాలు .. హింస ఎక్కువగా ఉన్నాయనే విమర్శలు వచ్చాయి. అయినా ఎంతమాత్రంవెనకబడకుండా తన జోరును కొనసాగిస్తూనే వెళ్లింది. సీజన్ 2 చూసినవారు, ఆ మరుసటి రోజు నుంచే సీజన్ 3 కోసం వెయిట్ చేయడం మొదలుపెట్టారంటే అర్థం చేసుకోవచ్చు. అలాంటి అభిమానుల నిరీక్షణకు తెరదించేస్తూ సీజన్ 3 అందుబాటులోకి వచ్చేసింది.
ఈ రోజు నుంచే సీజన్ 3 అమెజాన్ ప్రైమ్ లో స్ట్రీమింగ్ అవుతోంది. 10 ఎపిసోడ్స్ గా ఈ సిరీస్ ను వదిలారు. హిందీతో పాటు ఇతర భాషలలోను ఈ సిరీస్ అలరించనుంది. పంకజ్ త్రిపాఠి .. శ్వేత త్రిపాఠి .. అలీ ఫజల్ .. ఇషా తల్వార్ ప్రధానమైన పాత్రలను పోషించిన ఈ సిరీస్, భారీ అంచనాల మధ్య బరిలోకి దిగింది. అంతా కూడా గతంలో వచ్చిన రెండు సీజన్లకు మించి ఈ సీజన్ ఉంటుందని భావిస్తున్నారు. మరి వాళ్ల నమ్మకాన్ని ఈ సిరీస్ ఎంతవరకూ నిలబెడుతుందనేది చూడాలి.
