గతంలో ముంబై నుంచి చాలామంది అందమైన కథానాయికలు టాలీవుడ్ ఎంట్రీ ఇచ్చారు. కొంతమంది ఇక్కడ స్టార్ హీరోయిన్స్ గా చాలా కాలం పాటు చక్రం తిప్పేశారు. ఈ నేపథ్యంలోనే మరో ముంబై బ్యూటీ ‘రావణాసుర’ సినిమాతో తెలుగు తెరపై తన జోరును పెంచడానికి రెడీ అవుతోంది. ఆ సుందరి పేరే ‘దక్ష నగార్కర్’. టాలీవుడ్ కి ఈ అమ్మాయి 2015లోనే వచ్చింది. తేజ దర్శకత్వంలో వచ్చిన ‘హోరా హోరి’ ఆమె ఫస్టు మూవీ. ఈ సినిమాలో ఆమె హీరోయిన్ గానే మెరిసింది గానీ, అది ఫ్లాప్ కావడం వలన ఆమెకి గుర్తింపు రాలేదు.
ఆ తరువాత ఆమె ‘హుషారు’ సినిమాలో చేసింది గానీ, నలుగురిలో ఒకరుగా కనిపించడం వలన, జనాలు గుర్తుపట్టలేదు .. గుర్తుపెట్టుకోలేదు. ‘జాంబీ రెడ్డి’ రెడ్డి సినిమా హిట్ అయిందిగానీ, అందులో హీరోయిన్ గా చేసిన ఆనందికి ఆ క్రెడిట్ పోయింది. ఈ నేపథ్యంలోనే ఈ అమ్మాయి ‘బంగార్రాజు’లోని స్పెషల్ సాంగ్ లో మెరిసింది. ఇక్కడ కూడా అదే పరిస్థితి. ఇక ఇప్పుడు చేసిన ‘రావణాసుర’ సినిమాలోనూ దక్ష మెయిన్ హీరోయిన్ కాదు .. నలుగురిలో ఒకరిగానే కనిపించనుంది.
రవితేజ హీరోగా చేసిన ఈ సినిమాకి సుధీర్ వర్మ దర్శకత్వం వహించాడు. ఈ సినిమాలో అనూ ఇమ్మాన్యుయేల్ .. మేఘ ఆకాశ్ .. పూజిత పొన్నాడతో పాటు దక్ష అలరించనుంది. పాత్ర పరంగా నిడివి ఎంతనేది పక్కన పెడితే, ఈ సినిమా పరంగా ఆమె పేరు మాత్రం కాస్త ఎక్కువగానే వినిపిస్తోంది. ఏప్రిల్ 7వ తేదీన రానున్న ఈ సినిమా, తన కెరియర్ కి తప్పకుండా హెల్ప్ అవుతుందని ఆమె కూడా కాస్త గట్టిగానే చెబుతోంది. ఆమె నమ్మకాన్ని ఈ సినిమా ఎంతవరకూ నిలబెడుతుందనేది చూడాలి.
