అఖిల్ మంచి అందగాడు .. యూత్ లో మంచి ఫాలోయింగ్ ఉంది. డాన్సులు .. ఫైట్ల విషయంలోను తానేమిటన్నది నిరూపించుకున్నాడు. హీరోగా ఇంతవరకూ ఐదు సినిమాలు చేశాడు. అయితే ఈ ఐదు సినిమాలు కూడా ఆశించిన స్థాయిలో విజయాలను అందుకోలేకపోయాయి. చివరిగా అఖిల్ నుంచి వచ్చిన ‘ఏజెంట్’ సినిమా కూడా భారీ పరాజయాన్నే నమోదు చేసింది. ఆ సినిమా విడుదలై ఏడాది కావొస్తున్నా ఇంతవరకూ అఖిల్ నుంచి మరో సినిమా ఎనౌన్స్ మెంట్ రాలేదు.
ఈ నేపథ్యంలో అఖిల్ తన 6వ సినిమాను ఏ దర్శకుడితో చేయనున్నాడు? ఎప్పుడు సెట్స్ పైకి వెళ్లనున్నారు? అనేది ఆసక్తికరంగా మారింది. అభిమానుల సందేహానికి ఉగాది రోజున అఖిల్ తెరదించనున్నాడనే ఒక టాక్ ఇప్పుడు బలంగా వినిపిస్తోంది. అఖిల్ తన తదుపరి సినిమాను అనిల్ కుమార్ దర్శకత్వంలో చేయనున్నాడని తెలుస్తోంది. ఈ కుర్రాడు ఇంతకుముందు ‘సాహో’ సినిమాకి అసిస్టెంట్ డైరెక్టర్ గా పనిచేసి ఉన్నాడు. అతను చెప్పిన కథ వినగానే అఖిల్ ఓకే చెప్పాడట.
అఖిల్ హీరోగా నటించనున్న ఈ సినిమా, యూవీ క్రియేషన్స్ వారు నిర్మించనున్నారు. ప్రస్తుతం ఈ ప్రాజెక్టుకి సంబంధించిన సన్నాహాలు జరుగుతున్నాయి. ఉగాది రోజున ఈ ప్రాజెక్టు పూజా కార్యక్రమాలను జరుపుకుంటుందని అంటున్నారు. ఆ తరువాత నెల నుంచి రెగ్యులర్ షూటింగు మొదలవుతుందని చెబుతున్నారు. డిఫరెంట్ లుక్ తో అఖిల్ కనిపించనున్నాడని అంటున్నారు. త్వరలోనే మిగతా వివరాలు తెలియనున్నాయి.
