కోలీవుడ్ లో హీరోల మధ్య పోటీ బలంగా ఉంటుంది. ఒక వైపున రజనీ .. కమల్ బరిలోనే ఉన్నారు. మరో వైపున అజిత్ .. విజయ్, ఇంకో వైపున విక్రమ్ .. సూర్య .. ఇలా గట్టిపోటీ ఉంటుంది. ఆ పోటీని తట్టుకుని నిలబడుతూ, తనకంటూ ఒక ప్రత్యేకమైన క్రేజ్ ను .. మార్కెట్ ను సెట్ చేసుకున్న హీరోగా ధనుశ్ కనిపిస్తాడు. ఆయన తాజా చిత్రంగా ప్రేక్షకుల ముందుకు రావడానికి ‘రాయన్’ రెడీ అవుతోంది. ఈ సినిమా కోసం ధనుశ్ అభిమానులంతా ఎంతో ఆసక్తితో ఎదురుచూస్తున్నారు. ఎందుకంటే ఇది ధనుశ్ కి 50వ సినిమా.
కళానిధి మారన్ సమర్పిస్తున్న ఈ సినిమా, ఈ నెల 26వ తేదీన థియేటర్లలో దిగిపోనుంది. తమిళంతో పాటు ఇతర భాషల్లోను ఈ సినిమాను రిలీజ్ చేస్తున్నారు. ఏఆర్ రెహ్మాన్ సంగీతం ఈ సినిమాకి ప్రత్యేకమైన ఆకర్షణగా నిలవనుందని అంటున్నారు. నిన్న ఈ సినిమా నుంచి వదిలిన ట్రైలర్, అందరిలో మరింత కుతూహలాన్ని పెంచుతోంది. ‘అడవిలో బలమైన జంతువు సింహమే అయినప్పటికీ, తోడేలు మరింత ప్రమాదకరం’ అంటూ ధనుశ్ తో సెల్వరాఘవన్ చెప్పే డైలాగ్ తో ఒక్కసారిగా హైప్ వచ్చేసింది.
ఇక ఈ సినిమాలో ధనుశ్ లుక్ కొత్తగా ఉంది. దేనికైనా తెగించినట్టుగా ఆయన బాడీ లాంగ్వేజ్ కనిపిస్తోంది. ఆయన అలా మారడానికి బాల్యంలో ఏదో ఒక బలమైన కారణం ఉందన్నట్టుగా కొన్ని విజువల్స్ కనిపిస్తున్నాయి. ఈ సినిమాలోని తారాగణం కూడా అంచనాలు పెరగడానికి మరో కారణంగా చెప్పుకోవచ్చు. ఆ జాబితాలో ప్రకాశ్ రాజ్ .. ఎస్.జె.సూర్య .. అపర్ణ బాలమురళి .. వరలక్ష్మి శరత్ కుమార్ .. సందీప్ కిషన్ కనిపిస్తున్నారు. ఈ సినిమాకి కథను కూడా ధనుశ్ అందించడం విశేషం.
