చిరంజీవి రీ ఎంట్రీ తర్వాత రూటు మార్చి సినిమాలు చేస్తున్నారు. ఖైదీ నెంబర్ 150 సినిమాతో రీ ఎంట్రీ ఇచ్చిన చిరంజీవి ఇప్పుడు యంగ్ డైరెక్టర్స్ తో వరుసగా సినిమాలు చేస్తూ దూసుకెళుతున్నారు. యంగ్ డైరెక్టర్స్ ఎవరైనా సక్సెస్ సాధిస్తే అభినందించి కథ ఉంటే చెప్పు సినిమా చేద్దామని ఆఫర్ ఇస్తున్నారు. అలాగే టాలెంట్ ఉన్న ఆర్టిస్టులను ప్రొత్సహిస్తున్నారు. బ్లఫ్‌ మాస్టర్ సినిమాలో సత్యదేవ్ పర్ ఫార్మెన్స్ నచ్చడంతో గాడ్ ఫాదర్ మూవీలో విలన్ పాత్రకు సత్యదేవ్ అయితే బాగుంటుందని పిలిచి మరీ అవకాశం ఇచ్చారు.
తాజాగా మరో నటుడుకి కూడా పిలిచి మరీ విలన్ అవకాశం ఇవ్వబోతున్నారని వార్తలు వస్తున్నాయి. ఇంతకీ ఎవరా యాక్టర్ అంటారా..? ఆర్ఎక్స్ సినిమాతో హీరోగా ఎంట్రీ ఇచ్చి తొలి ప్రయత్నంలోనే సక్సెస్ సాధించిన కార్తికేయ. ఈ యంగ్ హీరో వాలిమై సినిమాతో విలన్ గా కూడా నటించి మెప్పించాడు. కార్తికేయ చిరంజీవి వీరాభిమాని. చిరు స్పూర్తితోనే ఇండస్ట్రీలోకి వచ్చినట్టు ఓ సందర్భంలో బయటపెట్టాడు. అది గుర్తొచ్చిందో ఏమో కానీ.. కార్తికేయను ప్రొత్సహించాలని డిసైడ్ అయ్యారట. చిరు చేయబోయే సినిమాలో అవకాశం ఇచ్చారని ఇండస్ట్రీలో టాక్ వినిపిస్తుంది.
చిరు ప్రస్తుతం భోళా శంకర్ మూవీ చేస్తున్నారు. ఈ సినిమా తర్వాత చిరు.. కళ్యాణ్ కృష్ణ డైరెక్షన్ లో సినిమా చేయనున్నారు. ఇందులో చిరుకు తనయుడుగా సిద్ధు జొన్నలగడ్డ నటిస్తున్నాడు. ఈ చిత్రాన్ని మెగా డాటర్ సుస్మిత కొణెదల నిర్మిస్తుంది. ప్రస్తుతం ఈ మూవీ ప్రీ ప్రొడక్షన్ వర్క్ జరుగుతుంది. ఇందులో కార్తికేయ విలన్ గా నటిస్తే బాగుంటుందని చిరు అనుకున్నారట. ఈ విషయాన్ని డైరెక్టర్ కళ్యాణ్ కృష్ణకు చెప్పినట్టు తెలిసింది. ఇది నిజమో కాదో తెలియదు కానీ.. ప్రస్తుతం ఈ వార్త ప్రచారంలోకి వచ్చింది. మరి.. క్లారిటీ రావాలంటే కొన్ని రోజులు ఆగాల్సిందే.
