హీరోగా నాని ఫుల్ బిజీ. ఆయన ప్లానింగును .. కథల ఎంపికను ఇండస్ట్రీలో అంతా మెచ్చుకుంటూ ఉంటారు. అలాంటి నాని తాజా చిత్రంగా ప్రేక్షకుల ముందుకు రావడానికి ‘సరిపోదా శనివారం’ రెడీ అవుతోంది. ఈ సినిమా తరువాత ‘దసరా’ ఫేమ్ శ్రీకాంత్ ఓదెల దర్శకత్వంలో ఒక సినిమా చేయనున్నాడు. ప్రస్తుతం ఈ సినిమాకి సంబంధించిన సన్నాహాలు జరుగుతున్నాయి. ఈ ప్రాజెక్టు తరువాత నాని చేయనున్న సినిమా ఏమిటనేది ఆసక్తికరంగా మారింది.
ఈ నేపథ్యంలోనే ‘హిట్ 3’ గురించిన మాట వినిపిస్తోంది. హీరోగా నాని వరుస సినిమాలు చేస్తూనే, అడపాదడపా నిర్మాతగా వ్యవహరిస్తున్నాడు. అలా ఆయన నిర్మాణంలో విష్వక్సేన్ హీరోగా వచ్చిన ‘హిట్’ మంచి వసూళ్లను రాబట్టింది. ఆ తరువాత అడివి శేష్ హీరోగా వచ్చిన ‘హిట్ 2’ కూడా మంచి లాభాలను తెచ్చిపెట్టింది. ‘హిట్ 3’ కూడా ఉంటుందనే హింట్ అప్పుడే ఇచ్చేశారు. అప్పటి నుంచి ఈ సినిమా ఎప్పుడు ఉంటుందా అని అభిమానులు వెయిట్ చేస్తూనే ఉన్నారు.
ఈ ప్రాజెక్టు త్వరలోనే పట్టాలెక్కనుందనేది తాజా సమాచారం. ‘హిట్ 2’ చేసిన శైలేశ్ కొలను ‘హిట్ 3’ కూడా చేయనున్నాడు. ఈ మధ్య ఆయన తెరకెక్కించిన ‘సైన్ధవ్’ పరాజయాన్ని మూటగట్టుకుంది. దాంతో ‘హిట్ 3’ ఆయన దర్శకత్వంలో ఉండొకపోవచ్చని అనుకున్నారు. కానీ శైలేశ్ దర్శకత్వంలోనే నాని ఈ సినిమాను ముందుకు తీసుకుని వెళ్లనున్నాడు. నాని ద్విపాత్రాభినయం చేయనున్న ఈ సినిమా, మొదటి రెండు భాగాలను మించిన వసూళ్లను రాబడుతుందేమో చూడాలి.
