‘హిరణ్యకశ్యప’.. ఎప్పటి నుంచో వార్తల్లో ఉన్న ప్రాజెక్ట్ ఇది. దగ్గుబాటి రానా, గుణశేఖర్ కలిసి చేయాలి అనుకున్నారు. ఈ చిత్రాన్ని భారీ బడ్జెట్ తో తీయాలి అనుకున్నారు. ప్రీ ప్రొడక్షన్ వర్క్ స్టార్ట్ చేశారు. హాలీవుడ్ సంస్థతో కలిసి ఈ చిత్రాన్ని నిర్మించాలి అనుకున్నారు. అయితే.. గుణశేఖర్ తో ఈ సినిమా చేయడానికి ముందుగా ఇంట్రస్ట్ చూపించిన సురేష్ బాబు ఆతర్వాత ఎందుకనో ఆసక్తి చూపించలేదు. అందుకనే అనుకుంట ఈ సినిమాను పక్కనపెట్టి గుణశేఖర్ శాకుంతలం సినిమాని స్టార్ట్ చేయడం జరిగింది.
శాకుంతలం సినిమా ప్రమోషన్స్ లో.. హిరణ్యకశ్యప గురించి ఏం జరిగిందో కొన్ని విషయాలను గుణశేఖర్ బయటపెట్టారు. ఈ ప్రాజెక్ట్ అనౌన్స్ చేసినప్పుడు త్రివిక్రమ్ స్వయంగా ఫోన్ చేసి ఈ చిత్రానికి మాటలు రాస్తానని అన్నారని.. చాలా హ్యాపీగా ఫీలై వెంటనే ఓకే అన్నానని చెప్పారు. అయితే.. ఆతర్వాత ప్రాజెక్ట్ ఆగిపోవడం తెలిసిందే అన్నారు. త్రివిక్రమ్.. ఈ చిత్రాన్ని తీయాలి అనుకుంటున్నారని వార్తలు వచ్చాయి. ఇదే విషయం గురించి గుణశేఖర్ ను అడిగితే.. ఆ విషయం తనకు తెలియదన్నారు. ఆతర్వాత ఎలాంటి అప్ డేట్ లేదు.
అయితే.. ఇప్పుడు ఎవరూ ఊహించని విధంగా హిరణ్యకశ్యప పై కీల‌క అప్ డేట్ బ‌య‌టికి వ‌చ్చింది. రానానే ఇందులో హిర‌ణ్య‌క‌శ్య‌పుడి పాత్ర పోషించ‌బోతున్నాడు. స్వయంగా అత‌నే ఈ ప్రాజెక్టును ప్ర‌క‌టించాడు. హాలీవుడ్ వేదిక‌గా జ‌రుగుతున్న కామిక్ కాన్ ఫెస్టివ‌ల్ కోసం యుఎస్ వెళ్లిన రానా.. అక్క‌డే హిరణ్యకశ్యప సినిమాను ప్ర‌క‌టించాడు. ఈ సినిమాలో త‌నే లీడ్ రోల్ చేయ‌నున్న‌ట్లు చెప్పాడు. ఈ సినిమా అమ‌ర్ చిత్ర‌క‌థల స్ఫూర్తితో తెర‌కెక్క‌నున్న‌ట్లు వెల్ల‌డించాడు. అన్నింటికీ మించి పెద్ద విశేషం ఏంటంటే.. ఈ సినిమాకు స్క్రిప్టు అందిస్తున్న‌ది త్రివిక్రమ్ శ్రీనివాస్. ఆ విషయం కూడా రానానే ప్ర‌క‌టించాడు. అయితే.. దర్శకుడు ఎవరు అనేది మాత్రం ప్రకటించలేదు. మరి.. దర్శకత్వ బాధ్యతలను ఎవరికి అప్పగిస్తారో చూడాలి.
