బన్నీ – సుకుమార్ కాంబినేషన్ లో ‘పుష్ప 2’ సినిమా రూపొందుతోంది. ఈ సినిమాకి సంబంధించిన షూటింగ్ చకచకా జరిగిపోతోంది. ఈ సినిమా నుంచి బన్నీ ‘మాతంగి’ లుక్ బయటికి వచ్చిన దగ్గర నుంచి అందరిలో మరింతగా ఆసక్తి పెరిగిపోతోంది. ‘మాతంగి’ లుక్ జాతర నేపథ్యంలో కనిపిస్తుందనీ, జాతర ఎపిసోడ్ స్క్రీన్ పై చాలాసేపు సందడి చేస్తుందనీ, ఈ ఎపిసోడ్ ఈ సినిమాకి హైలైట్ గా నిలుస్తుందనే టాక్ బయటకి రావడం, అందరిలో మరింత కుతూహలాన్ని పెంచుతోంది.
ఈ సినిమాలో ‘జాతర’ ఎపిసోడ్ కోసం కొన్ని వందలమంది స్క్రీన్ పై కనిపిస్తారట. ఈ ఎపిసోడ్ లోనే ఒక పాట .. భారీ యాక్షన్ సీన్ .. ఎమోషన్స్ తో కూడిన కీలకమైన సీన్ ఉంటాయని అంటున్నారు. ఈ ఎపిసోడ్ ను 35 రోజుల పాటు చిత్రీకరించినట్టుగా తెలుస్తోంది. ఈ ఒక్క ఎపిసోడ్ కోసమే 50 కోట్ల బడ్జెట్ ను కేటాయించినట్టుగా చెబుతున్నారు. ఈ ఎపిసోడ్ పతాక స్థాయినే ఇంటర్వెల్ బ్యాంగ్ గా వస్తుందని అంటున్నారు. సెకండాఫ్ పై ఒక రేంజ్ లో అంచనాలు పెంచేలా ఈ బ్యాంగ్ ఉంటుందనే అభిప్రాయాలు వ్యక్తమవుతున్నాయి.
అలా దాదాపు ఓ అరగంట నిడివితో ‘జాతర’ ఎపిసోడ్ అనేక విశేషాలతో తెరపై ఆవిష్కరించడం జరుగుతుందని సమాచారం. ఈ సినిమా రిలీజ్ తరువాత ఈ ఎపిసోడ్ గురించి చాలా రోజుల పాటు మాట్లాడుకునేలా డిజైన్ చేయడం జరిగిందని అంటున్నారు. రష్మిక కథానాయికగా అలరించనున్న ఈ సినిమాలో, ఫహాద్ ఫాజిల్ … ప్రకాశ్ రాజ్ .. రావు రమేశ్ .. సునీల్ .. జగదీశ్ ముఖ్యమైన పాత్రలను పోషించారు. దేవిశ్రీ ప్రసాద్ సంగీతాన్ని అందించిన ఈ సినిమా, ఆగస్టు 15వ తేదీన పాన్ ఇండియా స్థాయిలో థియేటర్లకు రానుంది.
