పదిహేనేళ్ల క్రితం పదహారేళ్ల వయసు పైబడిన ఏ అబ్బాయిని కదిలించిన కాజల్ అగర్వాల్ నామమే జపం చేశారు. అంతలా తన సినిమాలతో యూత్‌లో తిరుగులేని పాపులారిటీ తెచ్చుకుంది ఈ ముంబై బ్యూటీ. చందమామా, మగధీర, డార్లింగ్‌, బృందావనం, మిస్టర్ పర్‌ఫెక్ట్‌ ఇలా బ్యాక్‌ టు బ్యాక్‌ బంపర్‌ హిట్లతో టాలీవుడ్‌లో మోస్ట్‌ వాంటెడ్‌ హీరోయిన్ అయిపోయింది. ఇప్పటికి సౌత్‌లో అత్యధిక రెమ్యునరేషన్‌ తీసుకునే నటీమణులలో కాజల్ ఒకరు. ప్రస్తుతం ఈ బ్యూటీ చేతిలో అరడజనుకు పైగానే సినిమాలున్నాయి. అందులో బాలకృష్ణ నటిస్తున్న భగవంత్ కేసరి ఒకటి.
అనిల్ రావిపూడి-బాలయ్యబాబు కాంబినేషన్‌లో రూపొందుతున్న భగవంత్ కేసరి సినిమా నుంచి కాజల్ అగర్వాల్ ఫస్ట్‌లుక్ వచ్చేసింది. కాజల్ బర్త్‌డే సందర్భంగా హీరోయిన్ ఫస్ట్‌లుక్‌ను మేకర్స్ రిలీజ్ చేశారు. చీరలో హోమ్లీగా ఉన్న కాజల్ ఓ సైకాలజీ పుస్తకం చదువుతున్నట్టుగా ఉంది. దసరా కానుకగా ప్రేక్షకుల ముందుకు రానున్న ఈ సినిమాకు థమన్ సంగీతం అందిస్తున్నారు.
భారీ అంచనాలతో రూపొందుతున్న ఈ సినిమా షూటింగ్ హైదరాబాద్‌లో శరవేగంగా జరుగుతోంది. ప్రధాన తారాగణంపై ముఖ్యమైన సన్నివేశాలను షూట్ చేస్తున్నారు. ఎప్పటికప్పుడు సినిమా విశేషాలను పంచుకుంటున్న చిత్రబృందం ఇప్పటికే టైటిల్, టీజర్‌తోపాటు సినిమాలో కీలక పాత్రలో కనిపిస్తున్న శ్రీలీల ఫస్ట్‌లుక్‌ను కూడా విడుదల చేశారు.
