ప్రస్తుతం కల్యాణ్ రామ్ ‘డెవిల్’ సినిమాకి సంబంధించిన పనులతో బిజీగా ఉన్నాడు. రేపు ఈ సినిమా భారీ స్థాయిలో థియేటర్లకు రానుంది. ఆ తరువాత ఆయన ‘బింబిసార 2’ను సెట్స్ పైకి తీసుకుని వెళ్లే అవకాశాలు కనిపిస్తున్నాయి. వశిష్ఠ దర్శకత్వంలో 2022లో వచ్చిన ‘బింబిసార’ భారీ విజయాన్ని అందుకుంది. హీరోగా – నిర్మాతగా కల్యాణ్ రామ్ కి ఈ సినిమా మంచి సంతృప్తిని ఇచ్చింది. ఈ తరహా సినిమాలను కూడా కల్యాణ్ రామ్ చేయగలడు అనే విషయాన్ని ఈ సినిమా నిరూపించింది.
అప్పటి నుంచి ఈ సినిమా సీక్వెల్ కోసం ఆడియన్స్ వెయిట్ చేస్తున్నారు. అలాంటి అభిమానుల ముచ్చటను తీర్చడానికి కల్యాణ్ రామ్ ఇప్పుడు రెడీ అవుతున్నట్టుగా చెబుతున్నారు. ‘బింబిసార’ సినిమా చేసిన వశిష్ఠ .. ప్రస్తుతం చిరంజీవి కథానాయకుడిగా ఒక పాన్ ఇండియా స్దినిమా చేస్తున్నాడు. ఆ తరువాత కూడా ఆయన ఇద్దరు సీనియర్ స్టార్ హీరోలకి కథలను వినిపించినట్టు చెబుతున్నారు. అందువలన ఆయన ‘బింబిసార 2’ను చేసే అవకాశం లేదని అంటున్నారు.
ఈ కారణంగానే ‘బింబిసార 2’ కథను తన టీమ్ తో కల్యాణ్ రామ్ సిద్ధం చేయిస్తున్నట్టుగా సమాచారం. దాదాపు స్క్రిప్ట్ వర్క్ పూర్తయిందనే అంటున్నారు. వచ్చే ఏడాదిలో ఈ సినిమా సెట్స్ పైకి వెళుతుందని చెబుతున్నారు. వచ్చే ఏడాదిలో కల్యాణ్ రామ్ చేసే భారీ సినిమా ఇదే అవుతుందని అంటున్నారు. ‘బింబిసార’ మాదిరిగానే సీక్వెల్ కి కూడా భారీ బడ్జెట్ కేటాయించినట్టుగా చెబుతున్నారు. త్వరలోనే మిగతా వివరాలు తెలియనున్నాయి.
