ఆంధ్రప్రదేశ్ లో మరోసారి భారీ స్థాయిలో డ్రగ్స్ పట్టుబడ్డాయి. విశాఖ సముద్ర తీరప్రాంతంలో 25 వేల కిలోల డ్రగ్స్ ను సిబిఐ అధికారులు సీజ్ చేశారు. ఈ కంటైనర్ బ్రెజిల్ నుంచి విశాఖకు చేరుకుంది. డ్రై ఈస్ట్ సరఫరా మాటున ఒక్కో బ్యాగ్ లో 25 కిలోల చొప్పున మొత్తం వెయ్యి బ్యాగుల్లో డ్రగ్స్ చేరుకున్నట్లు అధికారులు నిర్ధారించారు. విశాఖలోని సంధ్యా ఎక్స్ పోర్ట్స్ కంపెనీ పేరుమీద ఈ కంటైనర్ వచ్చినట్లు ప్రాధమికంగా అందిన సమాచారాన్ని బట్టి తెలుస్తోంది.
18వ తేదీన ఓ ఈ మెయిల్ ద్వారా సిబిఐకి దీనిపై సమాచారం వచ్చింది. వెంటనే అధికారులు ఇంటర్ పోల్ సాయంతో ఈ డ్రగ్స్ రాకెట్ ను ఛేదించారు. దీనికి ఆపరేషన్ గరుడగా నామకరణం చేసిన అధికారులు ఈ సాయంత్రం ఈ కంటైనర్ ను స్వాధీనం చేసుకున్నారు. నేడు పట్టుబడ్డ డ్రగ్స్ విలువ షుమారు 50 వేల కోట్ల రూపాయల పైమాటేనని సమాచారం. ఇంత పెద్ద మొత్తంలో డ్రగ్స్ స్వాధీనం చేసుకోవడం ఇదే మొదటిసారి అని అధికారులు వెల్లడించారు.
