ప్రజా వేదిక శిథిలాలే జగన్ అరాచక ప్రభుత్వ పతనానికి సమాధి రాళ్ళు అని తెలుగుదేశం పార్టీ జాతీయ ప్రధాన కార్యదర్శి నారా లోకేష్ అన్నారు. ఈ ప్రభుత్వ విధ్వంసానికి ప్రజావేదిక ప్రత్యక్షసాక్షిగా నిలుస్తోందని వ్యాఖ్యానించారు. జగన్ కూల్చివేతల పర్వం ఇప్పటికీ కొనసాగుతూనే ఉందన్నారు. ఈ ప్రభుత్వ 51 నెలల పాలనలో గూడు కోల్పోయిన లక్షలాది పేదల కన్నీరు దావానలంలా మారి ఈ ప్రభుత్వాన్ని కూల్చబోతోందని హెచ్చరించారు.
అధికారంలోకి రాగానే ప్రజా వేదిక పునర్నిర్మిస్తామని లోకేష్ ప్రకటించారు. జగన్ పాలనను తిరస్కరిస్తూ ప్రజలు ఇవ్వబోయే తీర్పుతో ప్రజా ప్రభుత్వం ఏర్పడబోతోందని, ఇంకా తొలగించని ఈ శిథిలాల సాక్షిగా సరికొత్త ప్రజావేదికను నిర్మిస్తామని చెప్పారు.
లోకేష్ చేపట్టిన యువ గళం పాదయాత్ర నేడు కృష్ణా జిల్లాలోకి ప్రవేశించింది. అంతకుముందు ప్రజా వేదిక వద్ద లోకేష్ సెల్ఫీ దిగి సామాజిక మాధ్యమాల్లో పోస్ట్ చేశారు.
