ఇప్పుడు ఇండస్ట్రీలో ఎక్కువగా మాట్లాడుకునే సినిమాల జాబితాలో ‘కన్నప్ప’ ఒకటిగా కనిపిస్తోంది. మంచు విష్ణు హీరోగా .. ఆయన సొంత బ్యానర్లో ఈ సినిమా నిర్మితమవుతోంది. ‘తిన్నడు’ అనే ఓ గిరిజన భక్తుడి కథ ఇది. పరమశివుడికి తన కళ్లను అప్పగించడానికి సిద్ధపడి .. ఆయన పరీక్షలో నెగ్గి .. కన్నప్పగా చరిత్రలో నిలిచిపోయాడు. ఈ కంటెంట్ తో ఇంతకుముందు కృష్ణంరాజు చేసిన ‘భక్త కన్నప్ప’ సంచలన విజయాన్ని సాధించింది. హీరోగా ఆయనను .. ఆయన బ్యానర్ ను కూడా ఈ సినిమా నిలబెట్టింది.
అదే కంటెంట్ తో మళ్లీ ఇంతకాలానికి మంచు విష్ణు ఈ సినిమాను చేస్తున్నాడు. ఈ సినిమాకి సంబంధించిన కథ అంతా కూడా అడవీ ప్రాంతంలోనే జరుగుతుంది. అందువలన న్యూజిలాండ్ లోని అటవీ ప్రాంతంలో ఈ సినిమా షూటింగును జరుపుతున్నారు. ఈ కథకి అద్భుతమైన వీ ఎఫ్ ఎక్స్ ను జోడించి విజువల్ వండర్ గా తీర్చిదిద్దుతున్నారు. ‘కన్నప్ప’ను ఓ గూడెం దొర పెంచుతాడు. ఆ దొర పాత్రలో మోహన్ లాల్ కనిపిస్తారని అంటున్నారు. ఇక పార్వతీ పరమేశ్వరులుగా ప్రభాస్ – నయనతార కనిపించనున్నారని చెబుతున్నారు.
కథా పరంగా .. ఈ సినిమా కోసం కేటాయించిన బడ్జెట్ పరంగా .. తారాగణం పరంగా ఈ ప్రాజెక్టుపై అందరిలో ఆసక్తి ఉంది .. అంచనాలు ఉన్నాయి. పోస్టర్స్ కూడా చాలా ఇంట్రెస్టింగ్ గా అనిపిస్తున్నాయి. ఈ మధ్య కాలంలో దైవం నేపథ్యంలోని కథలకు ఎక్కువ ఆదరణ లభిస్తోంది. ‘కార్తికేయ 2’ .. ‘హను మాన్’ సినిమాల విజయాలను అందుకు ఉదాహరణలుగా చెప్పుకోవచ్చు. అలాగే మహాశివుడి నేపథ్యంలో సాగే ‘కన్నప్ప’ కూడా సంచలన విజయాన్ని సాధించే అవకాశాలు పుష్కలంగా కనిపిస్తున్నాయి.
