‘RX 100’ తో దర్శకుడిగా అజయ్ భూపతి తన సత్తా చాటుకున్నాడు. రొమాంటిక్ టచ్ తో నడిచే ఆ సినిమాతో ఆయన భారీ హిట్ ను తన ఖాతాలో వేసుకున్నాడు. ఆ తరువాత ఆయన చేసిన ‘మహా సముద్రం’ ఆశించిన స్థాయిలో ప్రేక్షకులకు కనెక్ట్ కాలేకపోయింది. ఆ తరువాత కొంత గ్యాప్ తీసుకున్న ఆయన, ‘మంగళవారం’ సినిమాను థియేటర్లకు తీసుకుని వచ్చాడు. నవంబర్ 17వ తేదీన విడుదలైన ఈ సినిమా, సక్సెస్ టాక్ ను తెచ్చుకుంది.
పాయల్ ప్రధానమైన పాత్రను పోషించిన ఈ సినిమా, గ్రామీణ నేపథ్యంలో నడుస్తుంది. గ్రామాల్లో ఉండే రాజకీయాలు .. పెత్తందారీతనం .. అక్కడివాళ్లలో కొంతమందికి ఉండే రహస్య సంబంధాలు .. హీరోయిన్ మానసిక స్థితికి సంబంధించిన విపరీతం అనే అంశాలు ఈ కథలో కనిపిస్తాయి. కథ అంతా కూడా గ్రామీణ స్థాయిలోనే కొనసాగడం వలన, ఆడియన్స్ కి వెంటనే కనెక్ట్ అయింది. గ్రామాల్లో తరచూ చూసే సంఘటనలే కావడం వలన, ప్రేక్షకులు సహజత్వానికి దగ్గరగా వెళ్లారు.
అలాంటి ఈ సినిమా ఈ రోజు నుంచి ‘డిస్నీ ప్లస్ హాట్ స్టార్’ లో అందుబాటులోకి వచ్చింది. సైకలాజికల్ థ్రిల్లర్ జోనర్లో రూపొందిన ఈ సినిమా, కథాకథనాల వైపు నుంచి మెప్పిస్తుంది. ఫొటోగ్రఫీ … బ్యాక్ గ్రౌండ్ స్కోర్ కూడా ఆడియన్స్ ను ఆకట్టుకుంటాయి. థియేటర్ల నుంచి మంచి లాభాలను తెచ్చిపెట్టిన ఈ సినిమా, ఓటీటీ వైపు నుంచి మరింత ఎక్కువమందికి కనెక్ట్ అయ్యే అవకాశాలు ఉన్నాయి.
