రాష్ట్ర ఉప ముఖ్యమంత్రి, పంచాయతీరాజ్- గ్రామీణాభివృద్ధి, గ్రామీణ నీటి సరఫరా, అటవీ-పర్యావరణం; శాస్త్ర సాంకేతిక శాఖల మంత్రి పవన్ కళ్యాణ్ మంత్రిగా పదవీ బాధ్యతలు స్వీకరించారు. ఈ ఉదయం విజయవాడలోని నీటిపారుదల శాఖ గెస్ట్ హౌస్ లోని తన క్యాంపు కార్యాలయంలో ముందుగా పూజలు నిర్వహించి ఆ తర్వాత అధికారికంగా బాధ్యతలు చేపట్టారు.
ఈ సందర్భంగా రెండు ఫైళ్ళపై సంతకాలు చేశారు. ఉపాధి హామీ పథకాన్ని ఉద్యాన వన సంబంధిత పనులకు అనుసంధానించి నిధులు మంజూరు చేస్తూ మొదటి ఫైల్; గిరిజన గ్రామాల్లో పంచాయతీ భవనాలు నిర్మాణానికి సంబంధించిన ఫైల్ మీద రెండో సంతకం చేశారు. మంత్రులు నాదెండ్ల మనోహర్, కందుల దుర్గేశ్, జనసేన ఎమ్మెల్యేలు, నేతలు, కార్యకర్తలు, అధికారులు పవన్ కళ్యాణ్ కు శుభాకాంక్షలు తెలియజేశారు.
