Share to Facebook Share to Twitter share to whatapp share to telegram
Self-incrimination: “ఏంటల్లుణ్ని దువ్వినట్టు దువ్వుతున్నావ్…?” అంటూ మహానటుడు అల్లు రామలింగయ్య గారితో యముడికి మొగుడులో కామెడీగా బెదిరించినప్పుడే…,

ఖుషీలో తమ్ముడు భూమికతో “అమ్మా, నాన్నా, చిరంజీవీ కామన్ ఇంట్రెస్టులు. అందరికీ నచ్చే విషయాలు..!” అని చెప్పినప్పుడే..,

ఇంద్రలో వీణస్టెప్పు దుమ్ము రేపేసింది కాబట్టి, అవసరం లేకున్నా ఠాగోర్ లో కూడా వీణస్టెప్పు వేసినప్పుడే..,

ముగ్గురికి మనం సాయం చేయాలి, వాళ్లని తలా ముగ్గురికి సాయం చేయమని చెప్పి ఈ కాన్సెప్టును విశ్వవిఖ్యాతం చేయాలని చెప్పడానికి ముందే నేత్రదానం, రక్తదానం చేయాలని పరారేపరారేపంపంపంపరారే అంటూ డ్యాన్సాడుతూ చెప్పినప్పుడే…,

రచ్చలో అనాధైన హీరోతో తమన్నా డ్యాన్సాడుతూ “కొణిదెల వారి కొడకా, నీకపుడే అంతటి దుడుకా..?” అని పాటల్రాయించినప్పుడే..,

వినయవిధేయరామ సినిమాలో అనాధ హీరో పేరు రామ్.కొణిదెల అయినప్పుడే…,

వంశం, వంశం,‌వంశం అంటూ ప్రతీ సినిమాలో ఊదరకొట్టినప్పుడే..,

“నందమూరి నాయకా అందమైన కానుకా ముందరుంది చూసుకోరా..” అంటూ డ్యాన్సింగులాడినప్పుడే..,

Telugu Film Industry

నీ తాత టెంపర్, నీ నాన్న టెంపర్, బాబాయి టెంపర్..!” అని టైటిల్ సాంగులు రాసి వినిపించినప్పుడే..,

హీరోగారి కాల్షీట్లూ, పాతిక రూపాయల కొబ్బరికాయ దొరికితే చాలు, సినిమా మొదలెట్టొచ్చన్న పిచ్చి భ్రాంతులు మొదలైనప్పుడే..,

స్పాట్ ఇంప్రూవైజేషన్లూ, లొకేషన్లో డైలాగుల్రాసుకోవడం గురించి ఆత్మావలోకనం చేసుకునుంటే బావుండేది.

ఇప్పుడీ పైత్యం మాది దగ్గుబాటి ఫ్యామిలీ; మాది మెగా ఫ్యామిలీ అంటూ పరాకాష్టకు చేరింది.

మంచి నటులుగా ఉన్న ఎన్టీవోడికీ, నాగ్గాడికీ ముగ్గుబుట్ట విగ్గూ, కాటుక మీసాలూ, లిపిస్టిక్కూ, ఎర్రచొక్కా, పచ్చ బెల్బాటంప్యాంటూ, కుక్కబెల్టూ ఆహార్యంతో నీలంరంగు డైరీ ఇచ్చి కాలేజీకి పంపిన్నాడే పెంట మొదలైంది.

స్టార్లు యే క్యారెక్టరేస్తే దాన్నే హైలైట్ చేస్తూ రావణుణ్నీ, కీచకుణ్నీ, దుర్యోధనుణ్నీ మంచోళ్లని చెప్పిన రోజే సినిమా దుర్గంధభూయిష్టం కావడం మొదలయ్యింది.

జనానికి ఓటీటీలో విస్తృతంగా అవకాశాలు పెరిగి, జ్ఞానోదయమైనవేళ మీ పశ్చాత్తాపం గతజలసేతుబంధనం కాదూ…?

ఇబ్బడిముబ్బడిగా పారితోషికపు డబ్బులు దొబ్బుతూ టికెట్ల రేట్లు పెంచి స్పాట్ డైలాగులు రాస్తున్నారంటూ పాట్లు పడటం తప్పు కాదూ…?

-గొట్టిముక్కల కమలాకర్

Also Read :

చేతులు కాలాక…

Leave a Reply

Your email address will not be published.

Powered by Digital Ocean Design and Developed by Trade2online.com