రాజ్ త‌రుణ్‌ క‌ష్టానికి ఫ‌లితం ద‌క్కుతుంది – వైష్ణవ్ తేజ్‌

Tarun-Vaishnav: హీరో రాజ్ తరుణ్, వ‌ర్ష బొల్లమ్మ జంట‌గా న‌టించిన సినిమా `స్టాండప్ రాహుల్`.  ‘కూర్చుంది చాలు’ అనేది ట్యాగ్‌లైన్‌. శాంటో మోహన్ వీరంకి దర్శకుడిగా పరిచయం కాబోతున్నారు. ఈ సినిమాను డ్రీమ్ టౌన్ ప్రొడక్షన్స్ అండ్ హైఫైవ్ పిక్చర్స్ బ్యానర్ల పై నంద కుమార్ అబ్బినేని, భరత్ మాగులూరి నిర్మించారు. సిద్దు ముద్ద స‌మ‌ర్పకులు. అన్ని కార్యక్రమాలు ముగించుకుని హోలీ కానుక‌గా ఈరోజు ప్రేక్షకుల ముందుకు వ‌చ్చింది. ఈ సంద‌ర్భంగా జె.ఆర్‌.సి. కన్వెన్షన్ లో ప్రీ రిలీజ్ వేడుక జ‌రిగింది. ముఖ్యతిథిగా విచ్చేసిన వైష్ణవ్ తేజ్, ద‌ర్శకుడు అనిల్‌రావిపూడితో క‌లిసి బిగ్ టికెట్‌ను ఆవిష్కరించారు.

అనంత‌రం వైష్ణవ్ తేజ్ మాట్లాడుతూ… సిద్దు ఈ క‌థ‌ను శాంటో ద్వారా నాకూ వినిపించారు. ద‌ర్శకుడిలో చాలా క్లారిటీ వుంది. ట్రైల‌ర్‌ లో ఆ విష‌యాన్ని చ‌క్కగా చెప్పాడు. నేను, రాజ్ త‌రుణ్ ఒకేసారి కెరీర్‌ను మొద‌లు పెట్టాం. ఇప్పటికీ అలానే వున్నాడు. త‌ను మంచి న‌టుడు. త‌న తొలి సినిమాలా వుంది స్టాండప్ రాహుల్. త‌న క‌ష్టానికి ఫ‌లితం ద‌క్కుతుంది. వ‌ర్ష మిడిల్‌క్లాస్ మెలోడీస్ చూశాను. త‌న‌కు భ‌విష్యత్ వుంది. ఇంద్రజ గారు చక్కగా న‌టించారు. కెమెరా విజువ‌ల్స్‌, సంగీతం బాగా ఆక‌ట్టుకున్నాయి. అంద‌రికీ ఆల్ ది బెస్ట్ అన్నారు.

ద‌ర్శకుడు అనిల్ రావిపూడి మాట్లాడుతూ.. స్టాండప్ కామెడీ ద్వారా న‌వ్వించ‌డం క‌ష్టం. ఇందులో కామెడీనే కాదు చాలా అంశాలున్నాయ‌ని చిత్ర యూనిట్ చెబుతోంది. రాజ్‌ త‌రుణ్  ఉయ్యాల ‌జంపాల టైంలో వున్నట్లుగా  వున్నాడు. ఇంద్ర‌జ గారి సినిమాలు చూశాను. త‌ను మంచి న‌టి. ద‌ర్శకుడు శాంటోకి ఆల్ ది బెస్ట్‌. ట్రైల‌ర్‌ లోనే ఏది వుండ‌బోతుందో క్లారిటీగా చెప్పేశాడు. శ్రీ‌క‌ర్ సంగీతం బాగుంది. అంద‌రి కృషికి ఫ‌లితం ద‌క్కుతుంద‌ని న‌మ్మక‌ముంది. ఈ స్టేజీమీద కొంద‌రు స్టాండప్ కామెడీ చేశారు. ఇది చూస్తుంటే నా కాలేజీలో ఓసారి ర‌ఘుబాబు గారు చేసిన జోక్ గుర్తుకువ‌స్తుంది. దాన్ని నేను కాలేజీలో స్కిట్‌ గా చేశాను. అదే నాలో ద‌ర్శకుడు వున్నాడ‌నే గుర్తించేలా చేసిందంటూ.. బ‌స్‌ లో ఓ ప్రయాణీకుడు సీటులో కూర్చోకుండా అటూ ఇటూ న‌డుస్తూ ఎలా గ‌మ్యానికి చేరాడ‌నేది చెప్పి అంద‌రినీ న‌వ్వించారు.

రాజ్ త‌రుణ్ మాట్లాడుతూ.. నాకు ఎప్పటికీ గుర్తిండిపోయే సినిమా ఇది. అగ‌స్త్య రెండేళ్ళు ఈ సినిమాకే ప‌ని చేశాడు. ఇంద్రజ‌, ముర‌ళీశ‌ర్మ‌, వెన్నెల కిశోర్ మొద‌లైన‌వారితో ప‌ని చేయ‌డం గొప్పగా వుంది. ఇందులో నేను బాగా న‌టించానంటే కార‌ణం వర్ష. ద‌ర్శకుడు శాంటోతో ప‌ని చేయ‌డం హ్యాపీగా వుంది. సినిమా మాకు న‌చ్చింది. మీకూ న‌చ్చుతుంది. ఫ్యామిలీ డ్రామాతో కూడిన రామ్‌కామ్ సినిమా ఇద‌ని తెలిపారు.