ప్రభాస్ హీరోగా ప్రేక్షకుల ముందుకు రావడానికి ఇప్పుడు రెండు సినిమాలు రెడీ అవుతున్నాయి. ఒకటి మారుతి దర్శకత్వంలోని ‘రాజా సాబ్’ అయితే, మరొకటి నాగ్ అశ్విన్ దర్శకత్వంలోని ‘కల్కి’. ఈ రెండు సినిమాలు ఇప్పటికే చాలావరకూ చిత్రీకరణను జరుపుకున్నాయి. ఆ తరువాత సందీప్ రెడ్డి వంగా దర్శకత్వంలో ప్రభాస్ ‘స్పిరిట్’ సినిమా చేయవలసి ఉంటుంది. ఎనౌన్స్ మెంట్ ఎప్పుడో వచ్చింది. అందువలన ఈ ప్రాజెక్టు ఎప్పుడు సెట్స్ పైకి వెళుతుందా అని అభిమానులంతా ఎదురుచూస్తున్నారు.
ఈ నేపథ్యంలో ఈ సినిమా ప్రీ ప్రొడక్షన్ పనులు మొదలైనట్టుగా తెలుస్తోంది. ఈ డిసెంబర్ నుంచి రెగ్యులర్ షూటింగును మొదలెట్టే ఆలోచనలో ఉన్నారని టాక్. డిసెంబర్ నుంచి ప్రభాస్ డేట్స్ ఉన్నట్టుగా చెబుతున్నారు. అందువలన ఆ దిశగా ముందుకు వెళుతున్నారు. ఇక ఈ సినిమాలో హీరోయిన్ గా ఎవరిని ఎంపిక చేయనున్నారనేది హాట్ టాపిక్ గా మారింది. ఈ నేపథ్యంలో ముగ్గురు హీరోయిన్స్ పేర్లు తెరపైకి వచ్చాయి. ఆ జాబితాలో రష్మిక – కీర్తి సురేశ్ .. మృణాల్ ఠాకూర్ పేరు ఎక్కువగా వినిపిస్తోంది.
ప్రభాస్ సరసన నాయికగా ఇంతవరకూ చేయనివారినే తీసుకుందామనే నిర్ణయంతో, ఈ ముగ్గురి పేర్లను పరిశీలిస్తున్నారట. హను రాఘవపూడి కూడా ప్రభాస్ తో ఒక సినిమా చేయనున్నాడు. ఆ సినిమాలో హీరోయిన్ గా మృణాల్ ఉండే అవకాశం ఉంది. ఎందుకంటే ‘సీతారామం’ సినిమాతో ఆమెను టాలీవుడ్ కి పరిచయం చేసింది తనే. అందువలన బరిలో రష్మిక – కీర్తి సురేశ్ ఇద్దరు మాత్రమే ఉండొచ్చు. ‘యానిమల్’ సినిమాలో రష్మిక నటనను ఎంతో ప్రశంసిస్తూ వచ్చిన సందీప్, ఆమెను ఎంపిక చేసే అవకాశం ఎక్కువ అనే టాక్ వినిపిస్తోంది. అదే జరుగుతుందేమో చూడాలి మరి.
