మెగాస్టార్ చిరంజీవి ‘వాల్తేరు వీరయ్య‘ ద్వారా మరోసారి పక్కా మాస్ పాత్రలో అభిమానులను అలరించడానికి సిద్ధమవుతున్నారు. బాబీ కొల్లి (కేఎస్ రవీంద్ర) దర్శకత్వంలో రూపొందుతోన్న ఈ సినిమాను మైత్రిమూవీ మేకర్స్ పతాకంపై నవీన్ యెర్నేని, వై రవిశంకర్ నిర్మిస్తున్నారు. మాస్ మహారాజా రవితేజ ఈ సినిమాలో ఓ కీలక పాత్ర పోషిస్తున్న సంగతి తెలిసిందే. రవితేజ పాత్రకు సంబంధించిన పోస్టర్ నేడు విడుదల చేశారు. ఈ సినిమాలో పవర్ ఫుల్ పోలీస్ ఆఫీసర్ ఏసీపీ విక్రమ్ సాగర్ గా రవితేజ నటిస్తున్నారు. రవితేజ గొడ్డలి తో గ్యాస్ బండను లాగుతున్నట్లు పోస్టర్ లో కనిపిస్తోంది. మరో చేత్తో పెట్ డాగ్ ను ఎత్తుకున్నారు. ఈ లుక్ రవితేజ మాస్ మేనరిజాన్ని చూపెట్టేట్లుగా ఉంది.
ఈ పోస్టర్ ను షేర్ చేస్తూ “అతని background – కేవలం hard-work …… అతని సపోర్ట్ – ప్రేమించే మాస్’ అంటూ చిరంజీవి కామెంట్ చేశారు. చిరంజీవి సరసన శృతి హాసన్ కథానాయికగా నటిస్తుండగా, ప్రస్తుతం వీరిద్దరి మధ్యా రెండు పాటలను యూరప్ లో చిత్రీకరిస్తున్నారు. సంక్రాంతి కానుకగా 2023 జనవరి 13న సినిమాను విడుదల చేసేందుకు సన్నాహాలు చేస్తున్నారు.
