రవితేజ హీరోగా కార్తీక్ ఘట్టమనేని రూపొందించిన ‘ఈగల్’ కోసం అభిమానులంతా వెయిట్ చేస్తున్నారు. విశ్వప్రసాద్ – వివేక్ కూచిభొట్ల ఈ సినిమాను భారీ బడ్జెట్ తో నిర్మించారు. యాక్షన్ థ్రిల్లర్ జోనర్లో ఈ కథ నడుస్తుంది. అనుపమ పరమేశ్వరన్ – కావ్య థాపర్ కథానాయికలుగా నటించిన ఈ సినిమా, సంక్రాంతి కానుకగా ఈ నెల 13వ తేదీన థియేటర్లకు రావలసి ఉంది. కానీ ఇప్పుడు ఈ సినిమా రిలీజ్ డేట్ ను వాయిదా వేసుకుంది.
సంక్రాంతి బరిలోకి ఐదు సినిమాలు దిగాయి .. వాటిలో నాలుగు పెద్ద సినిమాలే. దాంతో థియేటర్ల విషయంలో సమస్య తలెత్తుతుందని ఇండస్ట్రీ పెద్దలు భావించారు. ఈ విషయంపై నిన్న అందరూ సమావేశమై ఒక నిర్ణయానికి వచ్చారు.సంక్రాంతి రేస్ నుంచి తప్పుకున్నవారికి సోలో రిలీజ్ ఛాన్స్ ఇస్తామని ముందుగానే మాట ఇచ్చారు. అందువలన వారి సూచన మేరకు ఈ బరి నుంచి తప్పుకోవడానికి ‘ఈగల్’ నిర్మాతలు అంగీకరించారు. తమ సినిమాను ఫిబ్రవరి 9వ తేదీకి వాయిదా వేసుకున్నారు.
ఇప్పుడు జనవరి 12వ తేదీన ‘గుంటూరు కారం’ .. ‘హను మాన్’ సినిమాలు థియేటర్లకు రానున్నాయి. త్రివిక్రమ్ – మహేశ్ బాబు కాంబినేషన్ లో వస్తున్న మూడో సినిమాగా భారీ అంచనాలు ఉన్నాయి. ఇక పిల్లల వైపు నుంచి ‘హను మాన్’ పై ఆసక్తి ఎక్కువగా ఉంది. 13వ తేదీన ‘సైంధవ్’ విడుదల కానుంది. ట్రైలర్ రిలీజ్ తరువాత ఈ సినిమాపై అంచనాలు మరింతగా పెరిగాయి. 14వ తేదీన ‘నా సామిరంగ’ ప్రేక్షకుల ముందుకు రానుంది. గ్రామీణ నేపథ్యం ఈ సినిమాకి ప్లస్సయ్యే అవకాశాలు ఎక్కువగా ఉన్నాయి.
