తెలుగు తెర అందమైన కథానాయికల అక్షయ పాత్రలాంటిది. ఎప్పటికప్పుడు కొత్త కొత్త కథానాయికలు పుట్టుకొస్తుంటారు. గ్లామర్ తో పాటు కాస్త అభినయం .. ఇంకాస్త లౌక్యం ఉన్నవారు ఇక్కడ నిలబడగలుగుతుంటారు. తెలుగు తెరకి ఈ మధ్య కాలంలో ఆషిక రంగనాథ్ .. అనిఖ సురేంద్రన్ .. గౌరీ కిషన్ కథానాయికలుగా పరిచయమయ్యారు. తొలి ప్రయత్నంలోనే ఆశించిన స్థాయి సక్సెస్ అందకపోయినా, వాళ్లకి మరికొన్ని సినిమాలు వచ్చే అవకాశాలు పుష్కలంగా ఉన్నాయి.
ఈ నేపథ్యంలోనే సాక్షి వైద్య తెలుగు ప్రేక్షకుల ముందుకు రానుంది. మహారాష్ట్రలో పుట్టి పెరిగిన ఈ బ్యూటీ, కాలేజ్ రోజుల నుంచే మోడలింగ్ చేస్తూ వచ్చింది. తెలుగులో సురేందర్ రెడ్డి దర్శకత్వంలో రూపొందిన ‘ఏజెంట్’ సినిమాలో అఖిల్ జోడీగా నటించింది. ఏప్రిల్ 28వ తేదీన ఈ సినిమా విడుదల కానుంది. ఈ సినిమా నుంచి రీసెంట్ గా వదిలిన లిరికల్ సాంగ్ వీడియోలో ఆమె అందంగానే మెరిసింది. ఈ సినిమా ఆమె కెరియర్ కి ఎంతవరకూ హెల్ప్ అవుతుందనేది చూడాలి.
అఖిల్ చేసిన ‘ మోస్ట్ ఎలిజిబుల్ బ్యాచిలర్’ హిట్ అనిపించుకున్నప్పటికీ ఆయన స్థాయికి అది చాలదు. ఆయన నుంచి అభిమానులు బ్లాక్ బస్టర్ హిట్ ను కోరుకుంటున్నారు. అందువలన ఈ సినిమాతో వారి ముచ్చట తీర్చాలనే ఉద్దేశంతోనే ఆయన ఉన్నాడు. ఇక డైరెక్టర్ గా సురేందర్ రెడ్డికి కూడా ఈ సినిమా హిట్ చాలా అవసరమే. అందువల్లనే వాళ్లంతా ఏప్రిల్ 28పైనే ఆశలు పెట్టుకున్నారు. అభిమానులు కూడా అప్పటివరకూ వెయిట్ చేయవలసిందే.
Also Read : ‘ఏజెంట్’ ఆ పోటీని తట్టుకుని విజేతగా నిలుస్తాడా..?
