కొన్ని అంతే. అలా జరిగిపోతాయి. దానికి కార్యకారణ సంబంధాలు; గ్రహచారాలు వెతుక్కుని లాభం లేదు. అలా రెండు మూడు చీకటి రాత్రుళ్లు ఆపి ఆపి ఓ టీ టీ లో సలార్ సినిమాకు నేను గురయ్యాను. ఆనిమల్ సినిమాను ప్రత్యేక దృష్టితో చూడాలని స్వయం ప్రకటిత సినీ మేధావులు ప్రవచిస్తున్నారు. అలా కె జి ఎఫ్ బ్రాండ్ ప్రశాంత్ నీల్ సినిమాలను కూడా ప్రత్యేక దృష్టితో చూడాలి.
వయసు వల్ల వచ్చిన దృష్టి మాంద్యమో లేక చీకట్లో జరిగిన చీకటి సామ్రాజ్యపు వాస్తవిక చిత్రీకరణకు నలుపు అవసరమయ్యిందో కానీ…నాలాంటి సినీ నిరక్షర చక్షులకు సినిమాలో వెలుగన్నదే కనిపించదు. …ఏడాది ఉతికినా నలుపు నలుపేకాని తెలుపు కాదు. కాకూడదు.
ఆపి ఆపి నిద్రపోవడానికి ముందు అనేక విడతల్లో మగతలో చూడడం వల్ల సలార్ సినిమాలో కథను నేను పట్టుకోలేకపోయాను. కాబట్టి కథను, కథనాన్ని సమీక్షించే నైతిక హక్కు నాకు ఉండదు. పాటల్లో సంగీత సాహిత్యాలు కనీసం ఇంగువ కట్టిన గుడ్డ కూడా కాదు.
ఇందులో నాకు నచ్చిన విషయం- హీరోగా ప్రభాస్ నరుకుడు. సొరకాయ పరపరా కోసినట్లు; క్యాబేజీ తరిగినట్లు; కొత్తిమీర తురిమినట్లు; లేత వంకాయ తొడిమ విరిచినట్లు; చెట్ల కొమ్మలు నరికినట్లు; పూలు తెంపినట్లు; అరటి ఆకులు మధ్యకు కోసినట్లు; కలుపు మొక్క ఏరిపారేసినట్లు; విత్తనాలు విసిరిసిరి చల్లినట్లు; గట్లల్లో చెట్లను కూకటివేళ్లతో పెకలించినట్లు; శవాలను తూర్పారబట్టినట్లు; శవాలను గోనెసంచుల్లో వేసి బండ్లకు కట్టినట్లు; రక్తం కాలువలు కట్టినట్లు; భయవిహ్వల హింస…ప్రశాంత ప్రమోద ప్రహృష్ట హంస గీతమైనట్లు; చావు జాతరకు మరో ప్రపంచపు అరుణవర్ణ లోకం అర్ణవమై ఎలుగెత్తి బృందగానం పాడినట్లు; కత్తికి ఎదురెళ్లి సినిమా తెర పరా పరా చిరిగి…విశ్రాంతిలో ప్రేక్షకుల బలానికి రక్తం లోటాల్లో ఇచ్చినట్లు…చంపితే ఇలా విసుగు విరామం లేకుండా చంపాలి అని పరమ శాంతమూర్తులు కూడా వంటిళ్లలో కత్తులు పట్టుకుని వీధుల్లో పడేలా…ఆ చంపుడు ఒక అనిర్వచనీయ మృత్యుహేల- భలే భలే హొమ్ బలే ప్రశాంత్ నీల్ లీల!
ఇంతకూ..
నా పేరేమిటి?
ఇలా పగలే పగల సెగల చీకట్లు కమ్ముకున్నాయేమిటి?
-నిస్సహాయ సలార్ సగటు మౌనప్రేక్షకుడిని.. నా ఇంటికి దారేది? ఎర్రగడ్డకు బస్సేది?
9989090018
పమిడికాల్వ మధుసూదన్ విశ్లేషణల కోసం ఫాలో అవ్వండి
YouTube – ధాత్రి మహతి
Twitter – ఐధాత్రి2
Facebook – ఐధాత్రి తెలుగు
Instagram – ఐధాత్రి తెలుగు
