అప్పట్లో ఒకడుండేవాడు, మెంటల్ మదిలో, నీది నాది ఒకే కథ, బ్రోచేవారెవరురా, గాలి సంపత్.. ఇలా విభిన్న కథా చిత్రాల్లో నటిస్తున్న యువ హీరో శ్రీవిష్ణు నటించిన తాజా చిత్రం రాజరాజచోర. ఇందులో మేఘా ఆకాశ్ కథానాయిక. ఈ చిత్రానికి హసిత్ గోలి దర్శకత్వం వహించారు. పీపుల్ మీడియా ఫ్యాక్టరీ, అభిషేక్ అగర్వాల్ ఆర్ట్స్ సంయుక్తంగా ఈ చిత్రాన్ని నిర్మిస్తున్నాయి. త్వరలో ఈ సినిమా ప్రేక్షకుల ముందుకు వచ్చేందుకు రెడీ అవుతుంది. ఈ సందర్భంగా రాజరాజచోర టీజర్ను చిత్రయూనిట్ సోషల్మీడియా వేదికగా విడుదల చేసింది.
ఇక టీజర్ విషయానికి వస్తే.. ఇందులో శ్రీవిష్ణు.. సాఫ్ట్ వేర్ ఉద్యోగినని చెప్పుకునే దొంగగా కనిపించనున్నారు. ఈ దొంగను పట్టుకునేందుకు ప్రయత్నించే పోలీస్ గా రవిబాబు కనిపించనున్నారు. ఈయన నెగెటివ్ షేడ్స్ ఉన్న పాత్రలో నటించినట్లు టీజర్ చూస్తే తెలుస్తోంది. అలాగే.. గంగవ్వ, సునైనా ఇందులో కీలకపాత్రలు పోషించారు. ఈ మూవీ టీజర్ని షేర్ చేసిన శ్రీవిష్ణు.. ఈ పాత్రతో మీ ముందుకి రావడం నా అదృష్టం. ఈ కిరీటం ధరించినందుకు మీ పొట్ట చెక్కలయ్యేలా నవ్విస్తానన్నది నా శపథం అని ట్వీట్ చేశారు. ఈ టీజర్ చూస్తుంటే.. శ్రీ విష్ణు తన శపథం నిలబెట్టుకునేలానే ఉన్నాడు అనిపిస్తుంది.
