ఆ పసి ప్రాణాలు ఎందుకు ఆవిరైపోయాయి? ఆ కళ్లల్లో ఉండాల్సిన మెరుపు ఎక్కడ మాయమైంది? ఘజియాబాద్లో ముగ్గురు ఆడపిల్లలు ఆత్మహత్య చేసుకున్న వార్త విన్నప్పుడు గుండె తరుక్కుపోని మనిషి ఉండడు. వారు చనిపోయింది కేవలం ఉరితాడుకో, విషానికో కాదు.. సోషల్ మీడియా విసిరిన అదృశ్య వలకు! ఆన్లైన్ గేమ్స్లో గెలుపు కోసం వెతుకుతూ.. జీవితంలో ఓడిపోతున్న ఈ తరం దేనికి సంకేతం?
అమ్మ పిలుపు వినపడదు.. నోటిఫికేషన్ చప్పుడు తప్ప!
ఒకప్పుడు తల్లి గోరుముద్దలు పెడుతుంటే చందమామను చూసి మురిసిపోయిన బాల్యం.. నేడు ఫోన్ స్క్రీన్పై ‘రీల్స్’ చూస్తూ మొద్దుబారిపోతోంది. మనం పిల్లల చేతికి ఫోన్ ఇవ్వడం లేదు.. ఒక మత్తుమందును అలవాటు చేస్తున్నాం. ఘజియాబాద్ ఘటనలో వినిపిస్తున్న ‘కొరియన్ కల్చర్’ మోజు, ‘ఆన్లైన్ గేమింగ్’ వ్యసనం.. ఇవన్నీ మన ఇంటి గుమ్మం వరకూ వచ్చేశాయి. మన పక్కనే కూర్చున్న బిడ్డ ఏ లోకంలో ఉన్నాడో తెలియని స్థితిలో మనం ఉన్నాం.
ప్రభుత్వం కదులుతోంది.. కానీ…
కేంద్ర ఐటీ కార్యదర్శి ఎస్. కృష్ణన్ ఒక కీలక మాట చెప్పారు.. “ఇక ఉపేక్షించేది లేదు, సోషల్ మీడియాకు వయో పరిమితి ఖాయం” అని. ఆస్ట్రేలియా లాంటి దేశాలు తమ పిల్లలను కాపాడుకోవడానికి కఠిన చట్టాలు తెస్తుంటే, భారత్ కూడా అదే బాటలో పయనిస్తోంది.
- వయసు ధ్రువీకరణ: ఐడీ కార్డు ఉంటేనే మద్యం అమ్మినట్టు.. వయసు నిర్ధారణ అయితేనే సోషల్ మీడియా ఖాతా ఇచ్చే రోజులు రాబోతున్నాయి.
- ఆర్థిక సర్వే హెచ్చరిక: చదువు పేరుతో గంటల తరబడి ఆన్లైన్లో ఉంచడం వల్ల పిల్లలు ‘డిజిటల్ బానిసలు’గా మారుతున్నారని పార్లమెంటు సాక్షిగా నివేదికలు చెబుతున్నాయి.
ఏపీ, గోవాల అడుగులు.. ఆశలు!
ఆంధ్రప్రదేశ్ ప్రభుత్వం కూడా ఈ విషయంలో గట్టిగా ఆలోచిస్తోంది. ఇంటర్నెట్ వినియోగంపై పరిమితులు విధించకపోతే.. రేపటి తరం శారీరకంగా, మానసిక బలహీనంగా మారుతుందని పాలకులు గుర్తించడం శుభపరిణామం. కానీ చట్టం కంటే ముందే ‘ప్రేమ’ పని చేయాలి.
బిడ్డను గుండెలకు హత్తుకుందాం…ఫోన్లకు కాదు!
ముగ్గురు బాలికల చితులు రగిలిన చోట మిగిలిన ప్రశ్న ఒక్కటే.. మనం సంపాదిస్తున్నది ఎవరి కోసం? రేపు మన బిడ్డ మనతో మాట్లాడకుండా, కేవలం ఒక మొబైల్ స్క్రీన్తోనే బంధం పెంచుకుంటే.. ఆ ఆస్తికి అర్థం ఉందా? సోషల్ మీడియాలో వచ్చే ‘లైకుల’ కోసం పిల్లల ప్రాణాలను పణంగా పెట్టవద్దు.
ప్రభుత్వం నిబంధనలు తెస్తుంది.. కానీ బిడ్డలను కాపాడుకోవాల్సింది తల్లిదండ్రులే. స్మార్ట్ ఫోన్ చేతికి ఇచ్చి పక్కకు వెళ్లకండి.. వారితో కాసేపు మాట్లాడండి. వారి మౌనంలో దాగున్న ఆవేదనను చదవండి. లేదంటే.. ఘజియాబాద్ ఉదంతాలు పునరావృతమవుతూనే ఉంటాయి.
బాల్యాన్ని బతికించుకుందాం…భవిష్యత్తును కాపాడుకుందాం!
