ఎన్టీఆర్, ఎఎన్ఆర్, కృష్ణ, శోభన్ బాబు కాలంలో మల్టీస్టారర్ సినిమాలు ఎక్కువుగా వచ్చేవి. ఎన్టీఆర్,ఎఎన్ఆర్ నువ్వా..? నేనా..? అన్నట్టుగా పోటీపడినప్పటికీ వీరిద్దరూ కలిసి ఓ పాతిక చిత్రాల్లో కలిసి నటించడం విశేషం. దీనిని బట్టి అప్పట్లో మల్టీస్టారర్ సినిమాలు అంతలా వచ్చేవో.. ప్రేక్షకాభిమానులు ఎలా ఆదరించారో అర్థం చేసుకోవచ్చు. చిరంజీవి, బాలకృష్ణ, నాగార్జున, వెంకటేష్ టైమ్ లో మల్టీస్టారర్ చాలా వరకు తగ్గిపోయాయి. ఈ నలుగురులో నాగార్జున మల్టీస్టారర్ చిత్రాలు చేయడానికి ఎప్పుడూ ముందుండేవారు.
ఈమధ్య కాలంలో మళ్లీ మల్టీస్టారర్ ట్రెండ్ స్టార్ట్ అయ్యింది. సీతమ్మ వాకిట్లో సిరిమల్లె చెట్టు, గోపాలా గోపాలా, ఎఫ్‌ 2, ఆర్ఆర్ఆర్, ఎఫ్‌ 3, భీమ్లా నాయక్, బ్రో.. ఇలా మల్టీస్టారర్ చిత్రాలు ఎక్కువుగా వస్తున్నాయి. యంగ్ హీరోలు కూడా మల్టీస్టారర్ సినిమాలు చేయడానికి ఇంట్రస్ట్ చూపిస్తున్నారు. తాజాగా ఓ భారీ మల్టీస్టారర్ ప్లాన్ జరుగుతుందని తెలిసింది. అదే.. రవితేజ, విశ్వక్ సేన్, మంచు మనోజ్ ల భారీ మల్టీస్టారర్ అని వార్తలు వస్తున్నాయి. ఈ క్రేజీ మల్టీస్టారర్ ను కలర్ ఫోటో దర్శకుడు సందీప్ రాజ్ తెరకెక్కించనున్నారని టాక్.
రవితేజకు సందీప్ రాజ్ కథ చెబితే.. వెంటనే ఓకే చేశాడట. ఈ కథలో విశ్వక్ సేన్ మరో హీరోగా నటిస్తారని… ఇక విలన్ గా మంచు మనోజ్ నటిస్తారని ప్రచారం జరుగుతుంది. అయితే.. ఈ ప్రాజెక్ట్ ఎవరు నిర్మిస్తారు అనేది మాత్రం తెలియలేదు. సందీప్ రాజ్ అయితే మాస్ మూవీ మేకర్స్ దగ్గర లాక్ అయి వున్నారు. అందుచేత అదే బ్యానర్ తో పాటు మరో బ్యానర్ కలిసి ఈ సినిమాను నిర్మించే ప్రయత్నం చేస్తోంది. ప్రస్తుతం ప్రీ ప్రొడక్షన్ వర్క్ జరుగుతుంది. త్వరలోనే ఈ చిత్రాన్ని అనౌన్స్ చేయనున్నారని సమాచారం.
