సమ్మర్ లో ఒకరు కాదు.. ఇద్దరు కాదు.. ఏకంగా నలుగురు పాన్ ఇండియా హీరోలు రెండు వారాల గ్యాప్ తో ప్రేక్షకుల ముందుకు రానున్నారు. ఆ నలుగురు ఎవరో కాదు చరణ్, ఎన్టీఆర్, బన్నీ, ప్రభాస్. ఇంతకీ విషయం ఏంటంటే… చరణ్, శంకర్ కాంబినేషన్లో రూపొందుతోన్న పాన్ ఇండియా మూవీ ‘గేమ్ ఛేంజర్’. ఈ చిత్రాన్ని శ్రీ వెంకటేశ్వర క్రియేషన్స్ బ్యానర్ పై దిల్ రాజు నిర్మిస్తున్నారు. ఎప్పుడో రిలీజ్ కావాల్సిన ఈ సినిమా ఇండియన్ 2 కారణంగా ఆలస్యం అవుతుంది. తాజా సమాచారం ప్రకారం.. గేమ్ ఛేంజర్ మూవీని మార్చి మూడోవారంలో రిలీజ్ చేయనున్నారు.
ఇక గేమ్ ఛేంజర్ రిలీజ్ అయిన వారం లేదా రెండు వారాలకు ఏప్రిల్ 5న ఎన్టీఆర్ ‘దేవర’ సినిమా రిలీజ్ కానుంది. ఈ చిత్రానికి కొరటాల శివ దర్శకత్వం వహిస్తున్నాడు. ఎన్టీఆర్ ఆర్ట్స్, యువసుథ ఆర్ట్స్ సంయుక్తంగా ఈ చిత్రాన్ని నిర్మిస్తున్నాయి. ఇందులో ఎన్టీఆర్ కు జంటగా జాన్వీ కపూర్ నటిస్తుంటే.. విలన్ గా హీరో సైఫ్ ఆలీఖాన్ నటిస్తున్నాడు. ఈ చిత్రాన్ని షూటింగ్ స్టార్ట్ చేయకుండానే ఏప్రిల్ 5న విడుదల చేయనున్నట్టుగా ప్రకటించారు. ఆర్ఆర్ఆర్ తర్వాత ఎన్టీఆర్ నుంచి వస్తున్న సినిమా కావడంతో దేవర సినిమా పై భారీ అంచనాలు ఉన్నాయి.
ఇక దేవర తర్వాత అల్లు అర్జున్ పుష్ప 2 రిలీజ్ కానుంది. పుష్ప సినిమా నార్త్ లో సంచలనం సృష్టించింది. దీంతో పుష్ప 2 పై భారీ అంచనాలు ఉన్నాయి. ఈ సినిమా గ్లింప్స్ రిలీజ్ చేస్తే.. తక్కువ టైమ్ లోనే 100 మిలియన్స్ కు పైగా వ్యూస్ తో దూసుకెళుతుంది. ఈ చిత్రాన్ని డిసెంబర్ లేదా సంక్రాంతికి రిలీజ్ చేయాలి అనుకున్నారు కానీ.. సమ్మర్ లో రిలీజ్ కి రెడీ అవుతుంది. ఈ మూవీ తర్వాత ప్రభాస్ కల్కి మూవీ రిలీజ్ కానుంది. నాగ్ అశ్విన్ తెరకెక్కిస్తున్న పాన్ వరల్డ్ మూవీ కల్కి పై భారీగా అంచనాలు ఉన్నాయి. ఈ చిత్రాన్ని సంక్రాంతికి రిలీజ్ అనుకున్నారు కానీ.. మే 9న విడుదల చేయనున్నట్టుగా టాక్. ఇలా వచ్చే సమ్మర్ లో చరణ్ గేమ్ ఛేంజర్, ఎన్టీఆర్ దేవర, బన్నీ పుష్ప 2, ప్రభాస్ కల్కి చిత్రాలు రిలీజ్ కానున్నాయి. ఈ నలుగురు హీరోల ఫ్యాన్స్ కి పండగే..!
