ద‌ర్శ‌కుడిగా వైవిధ్య‌మైన సినిమాలను తెర‌కెక్కిస్తూ.. న‌టుడిగా విల‌క్ష‌ణ‌మైన పాత్ర‌ల్లో న‌టిస్తూ మెప్పిస్తున్న అవ‌స‌రాల శ్రీనివాస్ క‌థానాయ‌కుడిగా, రుహానీ శ‌ర్మ హీరోయిన్‌గా న‌టించిన చిత్రం ‘101 జిల్లాల అంద‌గాడు’. హిలేరియస్ ఎంటర్‌టైన‌ర్‌గా తెర‌కెక్కుతోన్న ఈ చిత్రం ద్వారా రాచ‌కొండ విద్యాసాగ‌ర్ ద‌ర్శ‌కుడిగా ప‌రిచ‌యం అవుతున్నారు. ఈ చిత్రాన్ని శ్రీవెంక‌టేశ్వ‌ర క్రియేష‌న్స్‌, ఫ‌స్ట్ ఫ్రేమ్ ఎంట‌ర్‌టైన్‌మెంట్స్, ఎస్‌వీసీ-ఎఫ్ఈఈ బ్యాన‌ర్స్‌ పై దిల్‌ రాజు, డైరెక్ట‌ర్ క్రిష్ స‌మ‌ర్ప‌ణ‌లో శిరీష్, రాజీవ్ రెడ్డి, సాయి బాబు జాగ‌ర్ల‌మూడి నిర్మించారు. ఈ చిత్రం సెప్టెంబ‌ర్ 3న విడుద‌ల‌వుతుంది. ఈ క్ర‌మంలో ఈ రోజు ఈ సినిమా ట్రైల‌ర్‌ను మెగా ప్రిన్స్ వరుణ్ తేజ్ విడుదల చేసి చిత్ర యూనిట్‌ను అభినందించారు.
ట్రైలర్ గ‌మ‌నిస్తే… పెళ్లి చేసుకోవాల్సిన వ‌య‌సులో యువ‌కుడికి బట్టతల వ‌చ్చిన‌ప్పుడు అత‌నెలాంటి స‌మ‌స్య‌ల‌ను ఎదుర్కొంటాడు.. త‌న స‌మ‌స్య‌ను దాచి పెట్ట‌డానికి .. త‌న ప్రేయ‌సి ద‌గ్గ‌ర త‌న‌కు బట్టతల ఉంద‌నే నిజం తెలియ‌నీయ‌కుండా అత‌ను ప‌డే ఇబ్బందులతో పాటు ఓ ఎమోష‌న‌ల్ కోణంలో సినిమా ఉంటుంద‌ని అర్థ‌మ‌వుతుంది. “నాన్న‌గారిది బట్టతల అయినా మీకు జుట్టు భ‌లే ఉంది బాబు” అని సెలూన్ న‌డిపే వ్య‌క్తి హీరో అవ‌స‌రాల శ్రీనివాస్‌తో అంటే.. ‘జ‌స్ట్ మెయిన్‌టెనెన్స్’ అంటూ త‌ను బ‌దులివ్వ‌డం హీరోయిన్ రుహానీ శ‌ర్మ‌కు తెలుగు రాదని తెలిసిన హీరో అవ‌స‌రాల, ఆమెకు ముందే బాయ్‌ఫ్రెండ్ ఉండి ఉంటాడ‌ని పాట రూపంలో చెప్ప‌డం.. దానికి ఆమె ఈ పాట హిందీలో కూడా ఉందిగా అని చెప్ప‌డం.. త‌న బ‌ట్ట‌త‌లను సెలూన్‌లో ప‌ని చేసే వ్య‌క్తికి చూపించి సైడ్స్ మాత్ర‌మే ట్రిమ్ చేయ‌మంటే వాడు షాక్ అవ‌డం, హీరోయిన్ ఇంటికి వెళ్లిన‌ప్పుడు బట్టతల క‌న‌ప‌డ‌నీయ‌కుండా పెట్టుకున్న విగ్ ఊడిపోయిన‌ప్పుడు ఏం చేయాలో తెలియ‌క ఇబ్బంది ప‌డ‌టం.. హీరోకి బట్టతల ఉంద‌ని అంద‌రికీ తెలిసిన‌పోయినప్పుడు అత‌ను మాన‌సికంగా ప‌డే సంఘ‌ర్ష‌ణ‌కు లోన‌య్యే స‌న్నివేశాలు అన్ని ట్రైలర్ చూపించారు.
టాలీవుడ్‌లో డిఫ‌రెంట్ మూవీస్‌లో న‌టుడిగా, సెన్సిబుల్ డైరెక్ట‌ర్‌గా, రైట‌ర్‌గా త‌న‌దైన గుర్తింపు సంపాదించుకున్న అవ‌స‌రాల శ్రీనివాస్ `101 జిల్లాల అంద‌గాడు` చిత్రంలో హీరోగా న‌టించ‌డ‌మే కాకుండా త‌న‌దైన కామెడీ పంచుల‌తో ప్రేక్ష‌కులు ఎంజాయ్ చేసేలా మంచి ఎంట‌ర్‌టైనింగ్ కథ అందిస్తే.. రామ్ సినిమాటోగ్ర‌ఫీ, శ‌క్తికాంత్ కార్తీక్ సంగీతం అందించారు.
