New ‘Hero’ Coming: సూపర్ స్టార్ కృష్ణ మనవడు, మహేష్ బాబు మేనల్లుడు, గుంటూరు ఎంపీ గల్లా జయదేవ్ కుమారుడు అశోక్ గల్లా క‌థానాయ‌కుడిగా పరిచయమ‌వుతున్న చిత్రం `హీరో`. నిధి అగర్వాల్ హీరోయిన్‌. శ్రీరామ్ ఆదిత్య దర్శకత్వంలో రాబోతోన్న ఈ చిత్రాన్ని అమర్ రాజా మీడియా అండ్ ఎంటర్టైన్మెంట్స్ ప‌తాకం పై శ్రీ‌మ‌తి గల్లా పద్మావతి నిర్మించారు. ఈ చిత్రం సంక్రాంతి కానుక‌గా జనవరి 15న విడుదల కాబోతోంది. ఈ సందర్భంగా హీరో అశోక్ గల్లా మీడియాతో ముచ్చటించారు. ఆ విశేషాలు ఆయన మాట‌ల్లోనే..
“దర్శకుడు ఏది చెబితే అది చేశాను. ఆయన ఓకే అన్నారా? లేదా? అని మాత్రమే చూశాను. అంత కంటే ఎక్కువగా నేను ఆలోచించలేదు. కథ గురించి ఇప్పుడే నేను ఎక్కువగా చెప్పలేను కానీ.. ట్విస్ట్‌ లోనే ఈ సినిమా టైటిల్‌కు జస్టిఫికేషన్ ఉంటుంది. రేపు రిలీజ‌య్యాక ఈ సినిమాకు హీరో టైటిల్ పర్ఫెక్ట్ అని అంతా అంటారు. నేను శ్రీరామ్ ఆదిత్య గారిని దర్శకుడిగా ఎంచుకోలేదు. మేం ఇద్దరం ఒకరినొకరు ఎంచుకున్నాం. ఇద్దరం కలిసి సినిమా చేయాలని అనుకున్నాం. ఆయన నన్ను హీరోగా ఎంచుకోవడం నా అదృష్టం.
నన్ను చూశారు.. అబ్బాయి నచ్చాడు అని చెప్పారు. ఏ సినిమాలు ఇష్టమని అడిగారు. అలా ఓ ఆరు గంటలు మాట్లాడుకుంటూ ఉన్నాం. చివరకు సినిమా చేసేద్దామని అన్నారు. శ్రీరామ్ ఆదిత్య గారి సినిమాలు, ఆయన తెరకెక్కించే విధానం అన్నీ బాగుంటాయి. ఆయనేంటో నాకు తెలుసు. స్టోరీ నచ్చింది, మేం కనెక్ట్ అయ్యాక నేనేం ఆలోచించలేదు. అంతా ఆయనే చూసుకుంటార‌ని అనుకున్నాను. నేను ఫ్యూచర్ గురించి ఎక్కువగా ఆలోచించలేదు. నా డెబ్యూ మూవీ అని మాత్రమే చూశాను.
తాత‌య్య కృష్ణ, మామ మహేష్ బాబు గార్ల లెగసీని కంటిన్యూ చేద్దామనే డ్యాన్స్, యాక్షన్‌లో ట్రైనింగ్ తీసుకున్నాను. నాకు మామూలుగా అయితే.. యాక్టింగ్ అంటేనే ఇష్టం. నేనేమీ నాచురల్ డ్యాన్సర్‌ని కాదు. జిమ్‌కు వెళ్లడం అంటే ఇష్టం ఉండదు. కానీ లెగసీ కోసమే ఇవన్నీ నేర్చుకున్నాను. చిన్నప్పటి నుంచి థియేటర్ ఆర్ట్స్ చేశాను. కాలేజ్‌లో నాకు ఫిల్మ్ డిగ్రీ ఉంది. నాకు ఏడు ఎనిమిదేళ్లున్న సమయంలోనే తాత గారు ఓ సినిమాలో పెట్టారు. నాని సినిమాలో కూడా నటించాను. అప్పుడు నాకు సినిమాల మీద ఇంట్రెస్ట్ కలిగింది. సింగపూర్‌లో థియేటర్ క్లాస్‌లు చేస్తుంటే అక్కడ వచ్చిన రెస్పాన్స్ చూసి సినిమాల్లోకి రావాలని ఫిక్స్ అయ్యాను.
ఇంకా సినిమా ఫైనల్ కాపీ రాలేదు. వచ్చాక కృష్ణ గారు, మహేష్ బాబు గారు చూస్తారు. ఈ సినిమా కంటే ముందు నాకు హార్స్ రైడింగ్ రాదు. కౌబాయ్ గెటప్ చెప్పినప్పుడు నాకు హార్స్ రైడింగ్ రాదని చెప్పాను. పర్లేదు అని డైరెక్టర్ గారు అన్నారు కానీ.. షూటింగ్‌కు వెళ్లే నెల ముందు మళ్లీ చెప్పారు. గుర్రం ఎక్కితే బాగుంటుందని డైరెక్టర్ అన్నారు. దీంతో హార్స్ రైడింగ్ నేర్చుకున్నాను. అది ఛాలెంజింగ్‌గా అనిపించింది. నాకు నటనపై ఆసక్తి ఉందని మహేష్ బాబు గారికి ఎప్పటి నుంచో చెబుతూ వచ్చాను. కానీ నేను ట్రైనింగ్ తీసుకుంటున్నాని తెలియడంతో సీరియస్‌గానే చెప్పాడని అనుకున్నారు.
ఇక్కడకు వస్తే ఎలా ఉండాలి.. ఎలా ధైర్యంగా ఉండాలి అనేదే ఎక్కువగా చెప్పారు. నేను బాగా చేశాను అని మా అమ్మ, నాన్న చెప్పారు. మా ఫాదర్‌ అయితే.. తెలుగు సినిమాలను జడ్జ్ చేయడం మానేశారు. ఆయనకు నచ్చిన సినిమాలు ఫ్లాప్ అవుతాయి. నచ్చని సినిమాలు హిట్ అవుతాయి. శ్రీరామ్ ఎడిటింగ్ స్టైల్ మా నాన్నకు ఇష్టం. మా అమ్మ అయితే.. సాధారణ తెలుగు ప్రేక్షకులురాలిగా ఉంటుంది. సినిమా నచ్చిందని చెప్పారు.
నిధి అగర్వాల్ ఎంతో ఫ్రీడమ్ ఇచ్చారు. ఇలా చేస్తే ఏమైనా అనుకుంటుందా? అనే అవకాశాన్ని కూడా ఇవ్వలేదు. అందుకే సీన్స్, సాంగ్స్ చాలా బాగా వచ్చాయి. ఆమె చాలా ప్రొఫెషనల్. మా గ్యాంగ్‌లో కలిసిపోయింది. ఈ సినిమాలో ఎక్కువగా ఎమోషనల్ సీన్స్ ఉండవు. కామెడీ, ఫైట్స్ ఎలా చేశానో.. ఎమోషనల్ సీన్‌లోనూ నటించారు. నాకు కెమెరా ముందే కంఫర్ట్ అనిపిస్తుంది. కెమెరా ముందున్న ఆ కొన్ని నిమిషాలు ఏమీ గుర్తుకు రాదు. దాని తరువాత టెన్షన్స్ మొదలవుతాయి.
మహేష్ బాబు గారు కరోనా స్వల్ప లక్షణాలే ఉన్నాయి, ఇప్పుదు క్షేమంగానే ఉన్నారు. ప్రస్తుతం క్వారంటైన్‌లో ఉన్నారు. ఇంకో రెండు మూడు రోజుల్లో బయటకు వస్తారు. కృష్ణ గారికి డేరింగ్ అండ్ డాషింగ్ అనేది పర్ఫెక్ట్ గా సెట్ అవుతుంది. ఆయన్నుంచి అదే నేర్చుకున్నారు. మహేష్ మామయ్య దగ్గరి నుంచి సెన్సాఫ్ హ్యూమర్, టాలెంట్, ఇంటెలిజెంట్, షార్ప్ నెస్ వంటి లక్షణాలను తీసుకున్నాను. నన్ను లాంచ్ చేయాలనే ఈ బ్యానర్‌ను స్థాపించాం. భవిష్యత్తులో దీన్ని ముందుకు తీసుకెళ్లాలని చూస్తున్నాం. ప్రపంచ వ్యాప్తంగా కరోనా ఉంది. కరోనా గురించి ఎప్పుడూ బాధపడలేదు. కానీ సినిమా ఆలస్యమవుతూ ఉందని అనిపించింది.
ఇందులో ఐదు పాటలుంటాయి. ప్రతీ ఒక్క పాటకు ప్రత్యేకమైన సందర్భంగా ఉంటుంది. అన్ని రకాల సినిమాలు చేయాలని అనుకుంటున్నాను. దర్శకుడితో సింక్ అయినా, కథ, కారెక్టర్‌కు కనెక్ట్ అయినా కూడా సినిమాను చేస్తాను. మంచి సినిమాలు చేయాలని అనుకుంటున్నాను. ప్రస్తుతం కథలు వింటూ ఉన్నాను. ఇంకా త‌దుప‌రి చిత్రం ఎవ‌రితో అనేది ఫైనల్ కాలేదు. ఈ సంక్రాంతికి హీరో సినిమాతో మీకు ఎంటర్టైన్మెంట్, ఎంజాయ్‌మెంట్ పెరుగుతుంది. జనవరి 15న హీరో సినిమాను థియేటర్లో అందరూ చూడండి…. అంటూ విశేషాలు వెల్లడించారు.
