పెంగ్విన్, మిస్ ఇండియా.. ఇలా లేడీ ఓరియంటెడ్ మూవీస్ లో నటించిన కీర్తి సురేష్ నటించిన తాజా చిత్రం ‘గుడ్ లక్ సఖి’. ఆది పినిశెట్టి మేల్ లీడ్ పోషిస్తున్న ఈ చిత్రంలో జగపతి బాబు కీలక పాత్రలో నటించారు. విలక్షణ దర్శకుడిగా గుర్తింపు తెచ్చుకున్న నగేష్ కుకునూర్ ఈ సినిమాతో టాలీవుడ్ లో అడుగుపెడుతున్నాడు. ఓ గ్రామీణ యువతి అంతర్జాతీయ షూటర్ గా ఎలా మారిందనే అనే విభిన్న కథాంశంతో ఈ చిత్రాన్ని రూపొందిస్తున్నారు. ఈ చిత్రాన్ని జూన్ 3న రిలీజ్ చేయాలని ముందుగా ప్లాన్ చేసుకున్నారు. అయితే కరోనా సెకండ్ వేవ్ కారణంగా అన్ని సినిమాల మాదిరిగానే ఈ సినిమాను కూడా వాయిదా వేయాల్సి వచ్చింది.
అయితే.. కీర్తి సురేష్ నటించిన పెంగ్విన్ చిత్రాన్ని గత సంవత్సరం ఓటీటీలో రిలీజ్ చేశారు. అలాగే ‘గుడ్ లక్ సఖి’ చిత్రాన్ని కూడా డైరెక్ట్ గా ఓటీటీలో రిలీజ్ చేయబోతున్నారంటూ వార్తలు వచ్చాయి. ఈ నేపథ్యంలో తాజాగా ప్రచారంలో ఉన్న వార్తలపై స్పందించారు చిత్ర నిర్మాత సుధీర్ చంద్ర. ‘గుడ్ లక్ సఖి’ ఓటీటీలో విడుదల కానుందని మీడియాలో వస్తున్న వార్తలు అవాస్తవమని, ధియేటర్లోనే ఈ సినిమా విడుదల చేస్తామంటూ స్పష్టత ఇచ్చారు. దయచేసి పుకార్లను స్ప్రెడ్ చేయొద్దని విజ్ఞప్తి చేశారు. ఏదైనా న్యూ అప్డేట్ ఉంటే స్వయంగా వెల్లడిస్తామని.. ప్రతి ఒక్కరూ ఇంటిలోనే ఉండి సురక్షితంగా ఉంటారని ఆశిస్తున్నామని నిర్మాత ప్రకటనలో పేర్కొన్నారు.
