అఖిల్ నటిస్తున్న మూవీ ‘ఏజెంట్’. ఈ చిత్రానికి సురేందర్ రెడ్డి దర్శకత్వం వహిస్తున్నారు. ఇందులో మమ్ముట్టి కీలక పాత్ర పోషిస్తుండడం విశేషం. దీంతో ఈ సినిమా పై మరింత క్రేజ్ ఏర్పడింది. భారీ చిత్రాల నిర్మాత అనిల్ సుంకర ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. ఆమధ్య రిలీజ్ చేసిన ఏజెంట్ టీజర్ మూవీ పై అంచనాలను రెట్టింపు చేసింది. దీంతో అక్కినేని అభిమానులు ఎప్పుడెప్పుడు మూవీ రిలీజ్ అవుతుందా అని ఆతృతగా ఎదురు చూస్తున్నారు.
ఎప్పుడో రిలీజ్ కావాల్సిన మూవీ చాలా సార్లు వాయిదాపడుతూ వచ్చింది. అయితే.. ఈసారి మాత్రం సంక్రాంతికి వస్తుందని మేకర్స్ ప్రకటించారు. అయితే.. సంక్రాంతికి ఏజెంట్ సినిమా మాత్రమే కాకుండా ‘వాల్తేరు వీరయ్య’, ‘వీరసింహారెడ్డి’ ‘ఆదిపురుష్’ కూడా సంక్రాంతి బరిలో నిలిచినప్పటికి ఇటీవలే ఆ సినిమా సంక్రాంతి పోరు నుండి తప్పుకున్నట్లుగా తెలుస్తోంది. ఆదిపురుష్ తప్పుకోవడం వల్లే ఏజెంట్ ను సంక్రాంతి బరిలో నిలిపేందుకు గాను ప్రయత్నాలు జరుగుతున్నాయి.
అఖిల్ ఒక బ్లాక్ బస్టర్ కోసం ఆతృతగా ఎదురు చూస్తున్నాడు. ఏజెంట్ తో ఆ విజయం దక్కుతుందా అంటే ఖచ్చితంగా దక్కుతుందనే నమ్మకంను సదరు చిత్ర యూనిట్ సభ్యులు వ్యక్తం చేస్తున్నారు. సినిమాలో ఎంత స్టఫ్ ఉన్నా కూడా ప్రమోషన్ అదే స్థాయిలో చేసి.. ప్రేక్షకుల ముందుకు తీసుకు రావాల్సి ఉంటుంది. ఏజెంట్ సినిమా ప్రమోషన్ కార్యక్రమాలు పెద్దగా జరగడం లేదు అనేది కొందరి అభిప్రాయం. సంక్రాంతికి రాబోతున్న వాల్తేరు వీరయ్య, వీరసింహారెడ్డి సినిమాలతో పోటీ పడాలంటే పబ్లిసిటీ పరంగా ఆ రెంటికంటే కూడా ముందు ఉండాలి అనేది విశ్లేషకుల అభిప్రాయం కానీ.. ఏజెంట్ మేకర్స్ మాత్రం ప్రమోషన్స్ మీద దృష్టి పెట్టకపోవడంతో అక్కినేని అభిమానులు టెన్షన్ పడుతున్నారు. మరి.. త్వరలోనే ఏజెంట్ మేకర్స్ ప్రమోషన్స్ పై దృష్టి పెడతారేమో చూడాలి.
