పురుషుల హాకీ ప్రపంచ కప్ లో భాగంగా పూల్ ‘ఏ’ జట్ల మధ్య నేడు జరిగిన మ్యాచ్ లలో సౌతాఫ్రికా పై ఫ్రాన్స్ 2-1 తేడాతో విజయం సాధించగా ఆస్ట్రేలియా- అర్జెంటీనా మధ్య జరిగిన మ్యాచ్ డ్రాగా ముగిసింది.
మొదటి మ్యాచ్ లో ఎనిమిదో నిమిషంలోనే ఫ్రాన్స్ పెనాల్టీ కార్నర్ ద్వారా తొలి గోల్ సాధించింది. 15వ నిమిషం చివరి క్షణాల్లో సౌతాఫ్రికా కూడా గోల్ సాధించింది. ఆట మరో మూడు నిమిషాల్లో ముగుస్తుందనగా ఫ్రాన్స్ మరో పెనాల్టీ కార్నర్ ను గోల్ గా మలిచి విజయం ఖాయం చేసుకుంది.
ఫ్రాన్స్ కెప్టెన్ విక్టర్ చార్లెస్ కు ‘ప్లేయర్ అఫ్ ద మ్యాచ్’ దక్కింది.
అర్జెంటీనా- ఆస్ట్రేలియా మధ్య జరిగిన రెండో మ్యాచ్ లో ఆస్ట్రేలియా 58వ నిమిషంలో గోవేర్స్ బ్లేక్ చేసిన గోల్ తో ఓటమిని తప్పించుకొని డ్రా చేసుకోగలిగింది.
10, 30, 58 నిమిషాల్లో ఆసీస్ మూడు గోల్స్ చేసింది. వీటిలో రెండు ఫీల్డ్ గోల్స్, ఒక పెనాల్టీ కార్నర్ ఉన్నాయి.
19,33,48 నిమిషాల్లో అర్జెంటీనా రెండు ఫీల్డ్ గోల్స్, ఒక పెనాల్టీ కార్నర్ గోల్స్ చేసింది.
అర్జెంటీనా ఆటగాడు మార్టిన్ ఫెర్రరియో ‘ప్లేయర్ అఫ్ ద మ్యాచ్’ అందుకున్నాడు.
