మహేష్ బాబు, త్రివిక్రమ్ శ్రీనివాస్ కాంబినేషన్లో అతడు, ఖలేజా చిత్రాలు రూపొందాయి. ఈ రెండు చిత్రాలు వీరిద్దరికీ మంచి పేరు తీసుకువచ్చాయి. అయితే.. వెండి తెర పై కన్నా బుల్లితెర పైనే బాగా విజయం సాధించాయి. ఇంకా చెప్పాలంటే.. మహేష్ ని సరికొత్తగా చూపించారు త్రివిక్రమ్. అందుకనే వీరిద్దరూ కలిసి మరో సినిమా చేస్తే చూడాలని అభిమానులు ఎప్పటి నుంచో కోరుకుంటుంటే.. ఇన్నాళ్లకు అంతా సెట్ అయ్యింది. ఈ భారీ, క్రేజీ మూవీని హారిక అండ్ హాసిని క్రియేషన్స్ బ్యానర్ పై రాధాకృష్ణ నిర్మిస్తున్నారు.
అయితే.. ఈ సినిమా టైటిల్ ఏంటి అనేది ప్రకటించలేదు. గత కొన్ని రోజులు నుంచి ఉగాదికి ఈ మూవీ టైటిల్ ప్రకటిస్తారని ప్రచారం జరిగింది కానీ.. అనౌన్స్ చేయలేదు. కారణం ఏంటంటే.. టైటిల్ త్రివిక్రమ్ కే నచ్చలేదట. అవును.. ఈ సినిమాకి ‘అయోధ్యలో అర్జునుడు’ అనే టైటిల్ అనుకున్నారు. ఈ టైటిల్ నే ఫిక్స్ చేస్తారని ప్రచారం జరిగింది. రామాయణం, మహాభారతం కలిపినట్టుగా కొత్తగా అయోధ్యలో అర్జునుడు అనే టైటిల్ ఉంది. అలాగే త్రివిక్రమ్ సెంటిమెంట్ అయిన అ అనే అక్షరంతోనే ఈ టైటిల్ స్టార్ట్ అయ్యింది కానీ.. ఎందుకనో త్రివిక్రమ్ మరో టైటిల్ చూద్దామని చెప్పారట.
ఉగాదికి టైటిల్ అనౌన్స్ మెంట్ అనుకున్నప్పటికీ.. ఇప్పుడు శ్రీరామనవమికి మారింది. అవును.. శ్రీరామనవమికి టైటిల్ అనౌన్స్ చేస్తారట. ప్రస్తుతం త్రివిక్రమ్ టైటిల్ ఫైనల్ చేసే పనిలో ఉన్నారట. ఫ్యామిలీ ఎంటర్ టైనర్ గా రూపొందుతోన్న ఈ మూవీలో మహేష్ కు జంటగా పూజా హేగ్డే, శ్రీలీల నటిస్తున్నారు. డైరెక్టర్ ఎస్ఎస్ థమన్ సంగీతం అందిస్తున్నారు. ఆగష్టు 11న ఈ చిత్రాన్ని విడుదల చేయాలి అనుకున్నారు కానీ.. దసరా లేదా సంక్రాంతికి విడుదల చేసే ఆలోచనలో ఉన్నారట. మరి.. త్వరలోనే రిలీజ్ పై క్లారిటీ ఇస్తారేమో.
