కెన‌డాలో భారీ స్థాయిలో కార్చిచ్చు ర‌గులుతున్న విష‌యం తెలిసిందే. ఆ దావాన‌లం నుంచి ద‌ట్ట‌మైన పొగ వ‌స్తోంది. అయితే ఆ పొగ ఇప్ప‌టికే అమెరికాలోని కొన్ని న‌గ‌రాల‌ను క‌మ్మేసింది. చాలా ద‌ట్టంగా వ్యాపిస్తున్న ఆ పొగ ఇప్పుడు అత్యంత దూరంలో ఉన్న నార్వేలోనూ ద‌ర్శ‌న‌మిస్తున్న‌ట్లు శాస్త్ర‌వేత్త‌లు చెబుతున్నారు. గ‌త కొన్ని రోజుల నుంచి కెన‌డాలోని అడ‌వుల్లో అంటుకున్న మంట‌ల నుంచి వ‌స్తున్న పొగ ఇప్పుడు గ్రీన్‌లాండ్‌, ఐస్‌లాండ్‌లోనూ క‌నిపిస్తోంది.
నార్వేలో ఉన్న క్లైమేట్ అండ్ ఎన్విరాన్‌మెంట‌ల్ రీస‌ర్చ్ ఇన్స్‌టిట్యూట్ ఆ కార్చిచ్చు పొగను డిటెక్ట్ చేసింది. చాలా సున్నిత‌మైన ప‌రిక‌రాల ద్వారా వాతావ‌ర‌ణంలో క‌లుగుతున్న మార్పుల్ని గ‌మ‌నించారు. నార్వే ప్ర‌జ‌లు స్వ‌ల్ప స్థాయిలో వాస‌న‌ను, ఆకాశంలో స్మోక్‌ను చూడ‌వ‌చ్చు అని ఎన్ఐఎల్‌యూ శాస్త్ర‌వేత్త నికోలోస్ ఇవాంజిలియో తెలిపారు. చాలా దూరం నుంచి వ‌స్తున్న ఆ పొగ చాలా స్వ‌ల్ప స్థాయిలో ఉంటుంద‌ని అన్నారు.
రానున్న కొన్ని రోజుల్లో కెన‌డా నుంచి వ‌స్తున్న కార్చిచ్చు పొగ యూరోప్ మొత్తంగా వ్యాపించనున్న‌ట్లు తెలుస్తోంది. అయితే ఆకాశంలో జరిగే ఆ మార్పును ప్ర‌జ‌లు గ‌మ‌నించ‌లేక‌పోవ‌చ్చు అని ఇవాంజిలియో తెలిపారు. కెన‌డా అడ‌వుల్లోంచి రిలీజైన పొగ చాలా ఎత్తు వ‌ర‌కు వెళ్తుంద‌ని, దాని వ‌ల్ల ఆ పొగ ఎక్కువ దూరం వ్యాపిస్తుంద‌న్నారు.
