ఆనంద్ దేవరకొండ, విరాజ్ అశ్విన్, వైష్ణవి చైతన్యలు కలిసి నటించిన మూవీ బేబీ. కలర్ ఫోటో లాంటి నేషనల్ అవార్డ్ సినిమాను ప్రొడ్యూస్ చేసిన సాయి రాజేష్ దర్శకత్వంలో బేబీ అనే సినిమా రాబోతోంది. ఇక ఈ ఫీల్ గుడ్ లవ్ స్టోరీ నుంచి విడుదలైన టీజర్, సాంగ్స్ ఇప్పటికే సూపర్ హిట్ అయిన సంగతి తెలిసిందే. జూలై 14న ఈ చిత్రం విడుదల కాబోతోంది. ఈ క్రమంలో చిత్ర నిర్మాత ఎస్‌కేఎన్ పుట్టిన రోజు సందర్భంగా చెప్పిన బేబీ విశేషాలు ఆయన మాటల్లోనే…
గత ఐదేళ్ల నుంచి రివర్స్ లెక్కపెడుతున్నా.. నాకు పుట్టినరోజు వేడుకలు చేసుకోవడం పెద్దగా ఇష్టం ఉండదు. ఈసారి బేబీ మూవీ ఉండడంతో ప్రత్యేకమైంది. ఈ సినిమా హై ఇంటెన్స్ ఎమోషనల్ ప్రేమ కథ. సంగీతం కూడా చాలా బాగుంటుంది. ఈ మధ్య కాలంలో ఈ స్థాయి చిత్రాలలో బెస్ట్ మ్యూజిక్ అని చెప్పొచ్చు. సీన్స్, డైలాగ్స్ చాలా కొత్తగా ఉంటాయి. ప్రతి ఒక్కరు.. ప్రతి ప్రెస్‌మీట్‌లో కొత్తదనం అనే పదం వాడి చాలా పాతది చేశారు. కానీ నేను గర్వంగా చెబుతున్నాను.
ఈ సినిమాలో ఇది వరకు చూడని సీన్లు.. చూడని పరిస్థితులు ఉన్నాయి. ఆ పరిస్థితులను దర్శకుడు తీర్చిదిద్దిన విధానం నచ్చింది. ఆ విధానం నచ్చే నేను ట్యాక్సీవాలా తరువాత కొంత గ్యాప్‌ తీసుకుని ఈ సినిమానే చేయాలని అనుకున్నాను. ఇది వరకు నేను కాంబినేషన్‌లో చాలా సినిమాలు చేశాను గానీ.. ఈ సినిమాను సోలో నిర్మాతగా చేయాలని ఫిక్స్ అయ్యాను. ముగ్గురు మధ్య జరిగే సీన్లలో కొత్త అప్రోచ్ ఉంటుంది. ఇంటర్వెల్ ముందు పెద్ద షాక్ ఉంటుంది. ఈ షాక్ నచ్చే సినిమాను నేను చేయాలని ఫిక్స్ అయ్యాను. విజయ్ దేవరకొండతో ట్యాక్సీవాలా చేస్తున్నప్పుడే సాయి రాజేష్ కథ చెప్పాడు. అప్పుడే నా తరువాతి సినిమా ఇదే అని చెప్పాను.
ట్యాక్సీవాలా సినిమా చేస్తున్నప్పుడే ఆనంద్‌తో మూవీ చేస్తానని చెప్పాను. అప్పటికి అతని ఫస్ట్ సినిమా రాలేదు. ఇంట్లో హీరో ఉన్నా.. చాలా సింపుల్‌గా ఉంటాడు. కథలో ఇద్దరు హీరోలు ఉంటారు. ఇందులో ఆనంద్ చేస్తే బాగుంటుందనిపించింది. మార్కెట్లను నేనే పెద్దగా నమ్మను. మనం క్రియేట్ చేసేదే మార్కెట్. విజయ్ దేవరకొండతో నేను సినిమా తీసే సమయానికి అర్జున్ రెడ్డి ఇంకా విడుదల కాలేదు. ఆయన స్టార్ అవుతాడని నమ్మి మూవీ తీశా. ఇక ఈ సినిమాతో నటుడిగా ఆనంద్‌కు బ్రాకెట్ క్రియేట్ చేస్తుంది. ఓ మైలురాయిగా మిగిలిపోతుంది.
