ఇప్పుడు ఆధునిక సాంకేతి పరిజ్ఞానం అందుబాటులకి వచ్చింది. ఒకప్పుడు తెరపై అద్భుతాలను చూపించాలనుకుంటే, అందుకు తగిన సాంకేతిక పరిజ్ఞానం అందుబాటులో లేకపోవడం వలన, రాజీపడటంగానీ .. ఆ ప్రాజెక్టులు పక్కన పెట్టడంగాని చేసేవారు. కానీ ఇప్పుడు అలాంటి పరిస్థితి లేదు. కంటెంట్ సరైనదై ఉండాలేగానీ, అనుకున్నది అనుకున్నట్టుగా తెరపై ఆవిష్కరించవచ్చు. అందువల్లనే ఇప్పుడు గ్రాఫిక్స్ తో కూడిన కథలకు గిరాకీ పెరిగిపోతోంది.
‘కార్తికేయ 2’ .. ‘అఖండ’ .. ‘ హను మాన్’ వంటి సినిమాలు అందుకు నిదర్శనంగా చెప్పుకోవచ్చు. ఇక ఇప్పుడు చిరంజీవి చేస్తున్న ‘విశ్వంభర’ .. ప్రభాస్ చేస్తున్న ‘కల్కి’ .. మంచు విష్ణు చేస్తున్న ‘కన్నప్ప’ కూడా విజువల్ ఎఫెక్ట్స్ కి సంబంధించినవి కావడం గమనించవలసిన విషయం. ఆ నేపథ్యంలోనే బెల్లంకొండ శ్రీనివాస్ కూడా ఇదే తరహా కథను ఎంచుకున్నట్టుగా సమాచారం. ప్రస్తుతం బెల్లంకొండ సాయిశ్రీనివాస్ వరుస ప్రాజెక్టులను లైన్లో పెట్టే పనిలో ఉన్నాడు. ఆ క్రమంలోనే ఆయన సైన్స్ ఫిక్షన్ .. సోషియో ఫాంటసీ టచ్ తో సాగే థ్రిల్లర్ సినిమాకి గ్రీన్ సిగ్నల్ ఇచ్చాడు.
మూన్ షైన్ పిక్చర్స్ వారు నిర్మించనున్న ఈ సినిమాకి లుథీర్ బైరెడ్డి దర్శకత్వం వహించనున్నాడు. 50 కోట్లతో ఈ సినిమా రూపొందనుంది. నిజానికి బెల్లంకొండకి ఉన్న మార్కెట్ కి ఈ బడ్జెట్ చాలా ఎక్కువ. కానీ కంటెంట్ పై నమ్మకంతో నిర్మాతలు ఈ మొత్తాన్ని ఖర్చు చేయడానికి సిద్ధపడటం విశేషం. ప్రస్తుతం ప్రీ ప్రొడక్షన్ పనులు జరుగుతున్నాయి. జూన్ నుంచి రెగ్యులర్ షూటింగుకి వెళ్లే ఆలోచనలో ఉన్నారు. సంయుక్తా మీనన్ ఈ సినిమాలో కథానాయికగా అలరించనుంది.
