ప్రభుత్వ పథకాలను, సేవలను ప్రజలకు మరింత చేరువగా తీసుకు వెళ్లేందుకే ‘జగనన్న సురక్ష’ కార్యక్రమం నిర్వహిస్తున్నామని రాష్ట్ర ముఖ్యమంత్రి వైఎస్ జగన్ మోహన్ రెడ్డి స్పష్టం చేశారు. “నోరు తెరిచి అడగలేని, పొరపాటున ఎక్కడైనా, ఎవరైనా పథకాలు పొందకుండా మిగిలిపోయి ఉంటే ఆ అర్హులకు కూడా మంచి చేసే కార్యక్రమమే జగనన్న సురక్ష” అని వెల్లడించారు. రాష్ట్రవ్యాప్తంగా 15,004 గ్రామ/వార్డు సచివాలయాల పరిధిలో నేటినుంచి నెల రోజుల పాటు నిర్వహించే ఈ కార్యక్రమాన్ని తాడేపల్లిలోని సిఎం క్యాంపు కార్యాలయం నుండి జగన్ లాంఛనంగా ప్రారంభించారు.
ఈ సందర్భంగా అధికార యంత్రాంగానికి సిఎం పలు సూచనలు చేశారు….
- జగనన్నకు చెబుదాం కార్యక్రమాన్ని మరింత ముందుకు తీసుకెళ్తూ ‘జగనన్న సురక్ష’ను చేపట్టాం. దీని ద్వారా నేరుగా ప్రజల వద్దకు వెళ్తారు
- అర్హులై ఉండి ఏ ఒక్కరూ కూడా పలానా సేవలు కాని, పలానా లబ్ధి కాని అందలేదని చెప్పే అవకాశం ఉండకూడదు
- జల్లెడ పట్టి మరీ అర్హులను గుర్తించి పథకాలతో పాటు వారికి అవసరమైన ధృవీకరణ పత్రాలు కూడా ఇస్తారు
- నాలుగేళ్ల క్రితం రాష్ట్రంలో ఏ గ్రామాన్ని…వార్డును…పట్టణాన్నితీసుకున్నా, ఏ పని కావాలన్నా ప్రభుత్వ కార్యాలయాలు, అధికారులు, జన్మభూమి కమిటీల చుట్టూ తిరిగి లంచాలు ఇచ్చుకోవాల్సిన పరిస్థితి
- ఏ పని కోసం వెళ్లినా మీరు ఏ పార్టీకి చెందిన వారు అని అడిగేవారు, నాలుగేళ్లలో పరిస్థితిని పూర్తిగా మార్చాం
- పెన్షన్ కావాలన్నా.. రేషన్ కావాలన్నా నేరుగా ఇంటికే తీసుకువచ్చే గొప్ప వాలంటీర్ వ్యవస్థను తీసుకువచ్చాం
- గ్రామ, వార్డు సచివాలయాల ద్వారా అధికారంలోకి వచ్చిన ఆరు నెలల్లోపే దీన్ని తీసుకు వచ్చాం
- కులం చూడకుండా, మతం చూడకుండా, చివరకు వారు ఏ పార్టీవారో చూడకుండా, రాజకీయాలకు తావే లేకుండా ఎక్కడా ఒక్క రూపాయికూడా లంచం ఇవ్వాల్సిన అవసరం లేకుండా, వివక్షకు తావు లేకుండా పౌరసేవలు అందించడం మన ప్రభుత్వంలోనే ప్రారంభం అయ్యింది
- ప్రతిపక్షాలకు అజెండా అన్నది ఏదీ మిగల్లేదు
- పెన్షన్లు కానివ్వండి, రేషన్ కార్డులు కానివ్వడం, ఇళ్లపట్టాలు కానివ్వండి, ఎలాంటి సర్టిఫికెట్లు కావాలన్నా.. అత్యంత పారదర్శకంగా అందుతున్నాయి
- అంతకు మించి నవరత్నాల ద్వారా ఈ నాలుగు సంవత్సరాల కాలంలోనే అక్షరాల రూ. 2.16 లక్షల కోట్లు బటన్ నొక్కి అక్కచెల్లెమ్మల కుటుంబాల ఖాతాల్లోకి డీబీటీ ద్వారా జమచేయడం జరిగింది
- ఒక గొప్ప విప్లవం గ్రామ స్వరాజ్యాన్ని ప్రభుత్వ పాలనలో తీసుకు రాగలిగాం
- ఈ విప్లవంలో భాగంగానే అర్హులెవ్వరూ మిగిలిపోకూడదనే తపనతో జగనన్న సురక్ష చేపట్టాం
- అర్హులెవ్వరూ మిగిలిపోకూడదనే ప్రతి ఆరు నెలలకు ఒకసారి జులై, డిసెంబర్ మాసాల్లో లబ్ధిదారులకు సంక్షేమం మంజూరు చేస్తున్నాం
- దీనికి మరో ప్రయత్నంగా జగనన్నకు చెబుదాం కార్యక్రమాన్ని ప్రారంభించాం
- ఇన్ని జాగ్రత్తలు తీసుకున్న తర్వాత కూడా ఇంకా ఎక్కడైనాకూడా, ఎవ్వరైనా కూడా మిగిలిపోయే పరిస్థితి రాకూడదన్న ఉద్దేశంతో, అందాల్సిన మంచి అందకుండా ఉండాల్సిన పరిస్థితి ఉండకూడదని పేదవాళ్లకు మంచి జరగాలన్న తపన, తాపత్రయంతోనే దీన్ని చేపడుతున్నాం
- కేంద్రంతో మాట్లాడి ఇప్పటికే 2500 ఆధార్ సెంటర్లు ఏర్పాటు చేశాం, కేంద్రం ఇప్పటికే ఆధార్ మార్పులకు సంబంధించి విధివిధానాలు ప్రకటించాం
- వీటిప్రకారం సేవలను జగనన్న సురక్షా ద్వారా అందిస్తారు
- ఇలా ఎలాంటి సాంకేతిక సమస్యల వల్లనైనా నిజంగా అర్హత ఉండి.. ఏ ఒక్కరైనా, ఎవ్వరైనా మంచి జరగని పరిస్థితి ఉందంటే… దాన్ని సరిదిద్దడానికి ఇది ఉపయోగపడుతుంది
- ఎలాంటి సర్వీసు ఛార్జీలు కూడా ప్రభుత్వం వసూలు చేయడదు
అంటూ అధికారులకు నిర్దేశించారు.
