ఇంగ్లాండ్ తో జరుగుతున్న మూడో టెస్టులో ఇండియా ఘోర పరాజయం పాలైంది. ఇన్నింగ్స్ 76 పరుగులతో ఓటమి పాలైంది. లీడ్స్ లోని హెడింగ్లే స్టేడియంలో జరుగుతోన్న ఈ మ్యాచ్ నాలుగో రోజు మొదటి సెషన్ తోనే ముగిసింది. నిన్న మూడోరోజు ఇండియా ఆట తీరు కాస్త గాడిలో పడినట్లు కనిపించినా నేడు వరుస వికెట్లు పోగొట్టుకుని దారుణ పరాజయాన్ని మూట గట్టుకుంది. మిడిలార్డర్ ఆటగాళ్ళు రాణించలేక పోయారు.
పుజారా-91, కోహ్లి-45 పరుగులతో నేడు బ్యాటింగ్ ప్రారంభించారు. పరుగుల ఖాతా తెరవకముందే పుజారా ఓలీ రాబిన్సన్ బౌలింగ్ లో ఎల్బీగా వెనుదిరిగాడు. కోహ్లీ మరో పది పరుగులు జత చేసి వ్యక్తిగత స్కోరు 55 వద్ద రాబిన్సన్ బౌలింగ్ లోనే ఔటయ్యాడు. ఆ తర్వాత రవీంద్ర జడేజా 25 బంతుల్లో 5 ఫోర్లు 1 సిక్సర్ తో 30 పరుగులు సాధించినా అప్పటికే ఇండియా ఓటమి ఖరారైంది. ఓలీ రాబిన్సన్ ఐదు వికెట్లు సాధించి, క్రెగ్ ఓవర్టన్ -3 వికెట్లు రాబట్టారు. మొయిన్ అలీ, జేమ్స్ అండర్సన్ చెరో వికెట్ సాధించారు. ఈ గెలుపుతో ఐదు టెస్టుల సిరీస్ ను 1-1 తో సమం చేసింది ఇంగ్లాండ్.
నాలుగో టెస్ట్ మ్యాచ్ ఓవల్ స్టేడియం లో సెప్టెంబర్ 2 నుంచి ప్రారంభం కానుంది.
ప్లేయర్ అఫ్ ద మ్యాచ్ అవార్డు ఓలీ రాబిన్సన్ కు దక్కింది.
