అల్లూరి సీతారామరాజు మన్యం జిల్లా పాడేరు ఘాట్ రోడ్డు లో జరిగిన బస్సు ప్రమాదంలో ఇద్దరు మృతి చెందారు. పాడేరు ఘాట్ రోడ్డు వ్యూపోయింట్ వద్ద ఆర్టీసీ బస్సు అదుపు తప్పి 100 అడుగుల లోయలో పడిపోయింది. ఈ బస్సు పాడేరు నుండి చోడవరం వెళ్తుండగా ఈ ప్రమాదం చోటు చేసుకుంది. ప్రమాద సమయంలో బస్సులో మొత్తం 60 మంది ప్రయాణికులు ఉన్నారు. వీరిలో ఇద్దరు మృతి చెందగా మరొకరి పరిస్థితి విషమంగా ఉంది.
కాగా, ఈ ప్రమాద ఘటనపై రాష్ట్ర ముఖ్యమంత్రి వైఎస్ జగన్ మోహన్ రెడ్డి దిగ్భ్రాంతి వ్యక్తం చేశారు. ఘటనా స్థలికి వెళ్లాల్సిందిగా అల్లూరి , అనకాపల్లి, విశాఖపట్నం జిల్లా కలెక్టర్లను సిఎం ఆదేశించారు. క్షతగాత్రులకు మంచి ఆసుపత్రుల్లో మెరుగైన వైద్య సేవలు అందించాలని ఆయా జిల్లాల పోలీసు యంత్రాంగానికి ఆదేశాలు జారీ చేశారు. బాధిత కుటుంబాలకు తోడుగా నిలవాలని, ఘటనకు దారితీసిన కారణాలపై అధికారులు దృష్టిసారించాలని సూచించారు.
