మొదటి నుంచి కూడా అడివి శేష్ డిఫరెంట్ కాన్సెప్ట్ లను సెలెక్ట్ చేసుకుంటూ వెళుతున్నాడు. స్పై గా సాగే యాక్షన్ తరహా కథలను .. థ్రిల్లర్ జోనర్లోని కథలను సెట్ చేసుకుంటూ వెళుతున్నాడు. ఈ తరహా కథలను రెడీ చేసుకున్నవారు, ముందుగా అడివి శేష్ గురించే ఆలోచన చేసేలా తనని తాను మలచుకున్నాడు. గతంలో ఆయన చేసిన ‘గూఢచారి’ సినిమా హిట్ కావడంతో, ఇప్పుడు ఆ సినిమాకి సీక్వెల్ గా ‘ గూఢచారి 2’ చేయనున్నాడు. ఈ సినిమాకి ‘G 2’ అనే టైటిల్ ను ఖరారు చేసుకున్నారు.
ఈ సినిమాకి కథను అడివి శేష్ అందించడం విశేషం. వినయ్ కుమార్ అనే యువ దర్శకుడు ఈ సినిమాతో పరిచయమవుతున్నాడు. ఈ నేపథ్యంలో కొంతసేపటి క్రితం ఈ సినిమాకి సంబంధించిన ‘ప్రీ విజన్ ఈవెంట్’ జరిగింది. ఈ వేడుకలో అడివి శేష్ మాట్లాడుతూ .. “వినయ్ కొత్త దర్శకుడే అయినా, కథాకథనాలపై .. టేకింగ్ పై ఆయనకి మంచి క్లారిటీ ఉంది. తాను చెప్పదలచుకున్న విషయాన్ని కాన్ఫిడెంట్ గా చెప్పగలడు” అన్నాడు.
” ఈ సినిమా కథా పరిధి కాస్త ఎక్కువగా ఉంటుంది. ఐదు దేశాల్లో షూటింగు చేయవలసి ఉంటుంది. అంతకుముందుగా వినయ్ కోరినట్టుగా నేను సిక్స్ ప్యాక్ చేయవలసి ఉంటుంది. నాకు తెలిసి ఈ సినిమా పూర్తి కావడానికి ఏడాదిన్నర పట్టొచ్చు. 2024లో ఈ సినిమా థియేటర్లకు వచ్చే ఛాన్స్ ఉంది. ‘గూఢచారి’ సినిమా సౌత్ ఇండియా స్థాయిలోనే ఆకట్టుకుంటుంది. ‘G 2’ మాత్రం ఆల్ ఇండియా స్థాయి ఫ్రాంచైజీగా మారుతుందని గర్వంగా చెప్పగలను” అంటూ ముగించాడు.
