పవన్ కళ్యాణ్ హీరోగా, క్రియేటివ్ డైరెక్టర్ క్రిష్ జాగర్లమూడి రూపొందిస్తోన్న భారీ చిత్రం ‘హరిహర వీరమల్లు’. ఇందులో నిధి అగర్వాల్ నాయిక. మెగా సూర్యా ప్రొడక్షన్ బ్యానర్ పై లెజండరీ ప్రొడ్యూసర్ ఎ.ఎం. రత్నం సమర్పణలో నిర్మాత దయాకర్ రావు ఈ ఎపిక్ చిత్రాన్ని నిర్మిస్తున్నారు. పవన్ కళ్యాణ్ పుట్టినరోజు సందర్భంగా క్రిష్ ఈ సినిమా విడుదల తేదీని ప్రకటించారు. ఇంతకీ ఎప్పుడు రిలీజ్ చేయనున్నారంటే.. ఈ పాన్ ఇండియా మూవీని 2022 ఏప్రిల్ 29న విడుదల చేయనున్నట్టుగా ప్రకటించారు.
ఈ చిత్రాన్ని సంక్రాంతికి రిలీజ్ చేయనున్నట్టుగా గతంలో అనౌన్స్ చేశారు. అయితే.. సంక్రాంతికి ‘భీమ్లా నాయక్’ రిలీజ్ అవుతుంది. ఆతర్వాత సమ్మర్ లో ‘హరి హర వీరమల్లు’ గ్రాండ్ గా విడుదల చేయనున్నారు. ఏ విషయంలోనూ రాజీపడని ఉన్నతస్థాయి నిర్మాణ విలువలతో 150 కోట్లకు పైగా భారీ వ్యయంతో ఈ చిత్రాన్ని రూపొందిస్తున్నారు. ఇది పవన్ కళ్యాణ్ నటిస్తున్న ఫస్ట్ పాన్-ఇండియా. అందుచేత అత్యంత ప్రతిష్టాత్మకంగా రూపొందిస్తున్న ఈ సినిమాని తెలుగుతో పాటు హిందీ, తమిళ, మలయాళం భాషల్లో ఏక కాలంలో విడుదల చేయనున్నారు.
ఇప్పటి వరకు ‘హరిహర వీరమల్లు’ షూటింగ్ యాభై శాతం పూర్తయింది. త్వరలో తాజా షెడ్యూల్ ప్రారంభించడానికి ప్లాన్ చేస్తున్నారు. ఈ చిత్రానికి అగ్రశ్రేణి సంగీత దర్శకుడు ఎం.ఎం. కీరవాణి సంగీత బాణీలు అందిస్తుండగా, పేరు పొందిన సినిమాటోగ్రాఫర్ జ్ఞానశేఖర్ వి.ఎస్. కెమెరాను హ్యాండిల్ చేస్తున్నారు. ప్రముఖ రచయిత సాయిమాధవ్ బుర్రా ఈ చిత్రానికి సంభాషణలు సమకూరుస్తున్నారు.
