ఈ శుక్రవారం థియేటర్లకు వచ్చిన సినిమాలలో ‘హైడ్ అండ్ సీక్’ ఒకటి. విశ్వంత్ .. రియా సచ్ దేవ్ .. సాక్షి శివ ప్రధానమైన పాత్రలను పోషించిన ఈ సినిమాకి, బసిరెడ్డి రానా దర్శకత్వం వహించాడు. క్రైమ్ థ్రిల్లర్ జోనర్లో రూపొందిన ఈ సినిమాకి, నరేంద్ర బుచ్చిరెడ్డి నిర్మాతగా వ్యవహరించగా, లిజో సంగీతాన్ని సమకూర్చాడు. ఈ శుక్రవారం థియేటర్ల దగ్గర పెద్దగా సినిమాలు లేకపోవడంతో, సహజంగానే ఈ సినిమాపైకి దృష్టి వెళ్లింది.
ఈ సినిమాలో హీరో .. శివ పాత్రలో కనిపిస్తాడు. అతను ఒక మెడికల్ స్టూడెంట్. కాలేజ్ లో ‘వర్ష’ను చూడగానే తొలిచూపులోనే మనసు పారేసుకుంటాడు. వాళ్ల ప్రేమను అర్థం చేసుకున్న పెద్దలు పెళ్లికి అంగీకరిస్తారు. ఆ సమయంలో వరుస హత్యలు జరుగుతూ ఉంటాయి. ఆ కేసులో శివ ఒక అనుమానితుడిగా పోలీసులు అదుపులోకి తీసుకుంటారు. ఆ హత్యలతో శివకి ప్రమేయం ఉంటుందా? ఆ కేసును ఛేదించడానికి రంగంలోకి దిగిన వైష్ణవికి ఎలాంటి సవాళ్లు ఎదురవుతాయి? అనేది కథ.
ఒక కథ వరుస హత్యల చుట్టూ కథ తిరిగేటప్పుడు, హత్యలు జరుగుతున్న తీరు .. ఇన్వెస్టిగేషన్ జరుగుతున్న విధానమే ప్రేక్షకులలో ఉత్కంఠను పెంచుతూ వెళ్లాలి. ఏ క్షణంలో ఏం జరుగుతుందో అనే ఒక టెన్షన్ బిల్డప్ కావాలి. కానీ ఈ కథలో అదే లోపించింది. చకచకా పరుగెత్తవలసిన కథ, నిదానంగా .. నింపాదిగా నడుస్తూ ఉంటుంది. పైగా రొటీన్ కి భిన్నంగా లేని స్క్రీన్ ప్లే నిరాశపరుస్తుంది. అందువలన ఇది పెద్దగా ఆసక్తిని రేకెత్తించలేకపోయిన సాదాసీదా కంటెంట్ గానే అనిపిస్తుంది.
