రెండో టెస్టులో ఇండియా ఘనవిజయం సాధించింది. ఇంగ్లండ్ తో ఐదు టెస్టుల సీరీస్ లో భాగంగా చారిత్రక లార్డ్స్ మైదానంలో జరిగిన రెండో టెస్టులో చివరిరోజు బౌలర్లు చెలరేగడంతో ఇండియా విజయం సాధించి సిరీస్ లో 1-0 లీడ్ సాధించింది.
ఆరువికెట్ల నష్టానికి 181పరుగుల వద్ద చివరిరోజు ఆట మొదలు పెట్టిన ఇండియా మరో 117 జోడించి 298 పరుగులకు ఆలౌట్ అయ్యింది. మహమ్మద్ షమీ 70 బంతుల్లో 6 ఫోర్లు, 1 సిక్సర్ తో 56 పరుగులు చేయడం విశేషం. మరో బౌలర్ జస్ప్రీత్ బుమ్రా కూడా 34 పరుగులతో అజేయంగా నిలిచాడు.
60 ఓవర్లలో 272 పరుగుల లక్ష్యంతో బరిలోకి దిగిన ఇంగ్లాండ్ సిరాజ్, బుమ్రా, ఇశాంత్ ల బౌలింగ్ ధాటికి 120 పరుగులకే కుప్పకూలింది. దీనితో ఇండియా 151 పరుగుల తేడాతో విజయం సాధించింది. సిరాజ్-4, బుమ్రా-3 ఇషాంత్ శర్మ-2 వికెట్లు పడగొట్టగా మరొకటి షమీకి దక్కింది. కే.ఎల్. రాహుల్ కు ప్లేయర్ అఫ్ ద మ్యాచ్ అవార్డు దక్కింది.
