‘కన్నప్ప’ సినిమాకి సంబంధించి రోజుకో విషయాన్ని గురించి అంతా మాట్లాడుకునేలా టీమ్ శ్రద్ధ తీసుకుంటోంది. కొన్ని రోజులుగా రోజుకో అప్ డేట్ ఉండేలా చూస్తున్నారు. దాంతో ఎప్పటికప్పుడు సోషల్ మీడియాలో ‘కన్నప్ప’ కబుర్లు నానుతూనే ఉన్నాయి. ఆ క్రమంలోనే ఈ సినిమాలో ఒక కీలకమైన పాత్ర కోసం కాజల్ ను ఎంపిక చేశారనే వార్త బలంగా వినిపిస్తోంది. దాదాపు అది పార్వతీదేవి పాత్రనే అని అంటున్నారు. నిన్నటి నుంచే కాజల్ పేరు తెరపైకి వచ్చింది.
మంచు విష్ణు టైటిల్ రోల్ ను పోషిస్తున్న ఈ సినిమాలో, పరమశివుడిగా ప్రభాస్ కనిపించనున్నాడనే టాక్ వచ్చింది. కానీ ఆ పాత్ర అక్షయ్ కుమార్ వెళ్లగా .. ప్రభాస్ నందీశ్వరుడిగా కనిపించనున్నాడని అంటున్నారు. ఇక పార్వతీదేవి పాత్ర కోసం నయనతార .. అనుష్క పేర్లు వినిపిస్తూ వచ్చాయి. ఆ పాత్రకి గాను కాజల్ ను తీసుకున్నారనే మాట నిన్నటి నుంచి వినిపిస్తోంది. అయితే నయనతార – అనుష్క వేరే పాత్రలలో కనిపించనున్నారా? లేదంటే అది రూమర్ గానే నిలిచిపోతుందా? అనే విషయంలో క్లారిటీ రావలసి ఉంది.
ఈ సినిమాకి సంబంధించిన చిత్రీకరణను చాలా వరకూ న్యూజిలాండ్ లో ప్లాన్ చేశారు. అక్కడికి సంబంధించిన చిత్రీకరణను దాదాపు పూర్తిచేశారు. ప్రస్తుతం ఈ సినిమా షూటింగు హైదరాబాద్ లోని రామోజీ ఫిల్మ్ సిటీలో జరుగుతోంది. ఈ షెడ్యూల్లో శివపార్వతులకు సంబంధించిన సన్నివేశాలను చిత్రీకరించనున్నారు. అంటే కథలో భాగంగా ఇవి కైలాసానికి సంబంధించిన దృశ్యాలుగా తెరపైకి వస్తాయన్న మాట. ఆల్రెడీ మొన్ననే ఈ సెట్లో అక్షయ్ కుమార్ అడుగుపెట్టాడు. ఇక రేపో మాపో కాజల్ కూడా ఎంట్రీ ఇవ్వనున్నట్టు సమాచారం.
