ప్రభాస్ కథానాయకుడిగా నాగ్ అశ్విన్ దర్శకత్వంలో రూపొందిన ‘కల్కి’ .. రేపు థియేటర్లలో దిగిపోనుంది. వైజయంతీ మూవీస్ బ్యానర్లో అత్యధిక బడ్జెట్ తో నిర్మితమైన పాన్ ఇండియా సినిమా ఇది. ఈ ప్రాజెక్టును ఎనౌన్స్ చేసిన దగ్గర నుంచి అందరిలో ఉత్కంఠను పెంచుతూనే ఉంది. పోస్టర్ల నుంచి ట్రైలర్ వరకూ ఆసక్తిని పెంచుతూనే వెళ్లాయి. ప్రభాస్ లుక్ కూడా ఈ స్థాయి కుతూహలం పెరగడానికి కారణమవుతోంది.
అటు పురాణాలను .. ఇటు సైన్స్ ఫిక్షన్ ను జోడిస్తూ తయారు చేసుకున్న ఈ కథ, పాత్రల పరంగా అందరిలో ఒక ఆలోచనను రేకెత్తిస్తూ వచ్చింది. ఇప్పుడది అడ్వాన్స్ బుకింగ్స్ పై ప్రభావం చూపుతూనే ఉంది. దేశవ్యాప్తంగా అడ్వాన్స్ బుకింగ్స్ జోరు ఒక రేంజ్ లో కొనసాగుతోంది. మొదటి రోజునే ఈ సినిమా 200 కోట్లను రాబట్టే అవకాశం ఉందని అంటున్నారు. వీకెండ్ నాటికి 500 కోట్ల మార్క్ ను టచ్ చేయడం ఖాయమేననే అభిప్రాయాలు వ్యక్తమవుతున్నాయి.
ఈ సినిమాలో అమితాబ్ .. కమల్ వంటి సీనియర్ స్టార్స్ నటించిన సంగతి తెలిసిందే. ప్రధానమైన పాత్రలను పోషించిన కొంతమంది ఆర్టిస్టులను మాత్రమే పరిచయం చేశారు. క్రేజ్ ఉన్న మరికొంతమంది ఆర్టిస్టులు ఈ సినిమాలో ఉన్నారట. అయితే వారిని ఇంతవరకూ రివీల్ చేయలేదు. ప్రేక్షకులు నేరుగా తెరపై చూసి థ్రిల్ పొందడం కోసం గోప్యంగా ఉంచారని అంటున్నారు. మరి అలా మెరిసే ఆ స్టార్స్ ఎవరనేది తెలియాలంటే, రేపటివరకూ వెయిట్ చేయవలసిందే.
