కార్తికేయ చాలాకాలంగా సరైన హిట్ కోసం వెయిట్ చేస్తూ వస్తున్నాడు. డిఫరెంట్ కంటెంట్ తోనే ఆడియన్స్ ముందుకు వెళ్లాలనే పట్టుదలతో మధ్యలో కొంత గ్యాప్ కూడా తీసుకున్నాడు. ఆ తరువాత ఆయన చేసిన సినిమానే ‘భజే వాయువేగం’. యూవీ కాన్సెప్ట్స్ వారు నిర్మించిన ఈ సినిమాకి ప్రశాంత్ రెడ్డి దర్శకత్వం వహించాడు. మే 31వ తేదీన విడుదలైన ఈ సినిమా, పాజిటివ్ టాక్ తెచ్చుకోవడం విశేషం. వరుస ఫ్లాపులతో ఉన్న కార్తికేకి, ఈ సినిమా ఉపశమనాన్ని ఇచ్చింది.
అలాంటి ఈ సినిమా స్ట్రీమింగ్ హక్కులను నెట్ ఫ్లిక్స్ వారు దక్కించుకున్నారు. ఈ సినిమాను ఈ నెల 28వ తేదీ నుంచి స్ట్రీమింగ్ చేయనున్నారు. అందుకు సంబంధించిన అధికారిక ప్రకటన వచ్చేసింది. స్ట్రీమింగ్ డేట్ కి సంబంధించిన పోస్టర్ ను కూడా వదిలారు. కార్తికేయ జోడీగా ఐశ్వర్య మీనన్ నటించిన ఈ సినిమాలో, రాహుల్ టైసన్ .. రవిశంకర్ .. తనికెళ్ల భరణి ముఖ్యమైన పాత్రలను పోషించారు. రధన్ నేపథ్య సంగీతం హైలైట్ గా నిలిచింది.
వరంగల్ రాజన్నపేట నుంచి ఈ కథ మొదలవుతుంది .. అక్కడి ఉంచి హైదరాబాద్ నేపథ్యంలో నడుస్తుంది. చిన్నతనంలోనే తల్లిదండ్రులను కోల్పోయిన హీరో, ఓ వ్యక్తి చేరదీయడం వలన పెద్దవాడవుతాడు. చిన్నప్పటి నుంచి క్రికెట్ పట్ల ఉన్న ఆసక్తి కారణంగా క్రికెటర్ కావాలని అనుకుంటాడు. అందుకోసం ఎంతో ఆశతో హైదరాబాద్ లోకి అడుగుపెట్టిన అతనికి అక్కడ ఎలాంటి అనుభవాలు ఎదురయ్యేయనేది కథ. ఓటీటీ వైపు నుంచి ఈ సినిమా ఎలాంటి రెస్పాన్స్ ను రాబట్టుకుంటుందనేది చూడాలి.
